გადაწყვეტილება ბიუროს ხდომაზე გამოცხადდა, რაც ნიშნავს, რომ კანონპროექტი ახლა განსახილველად კომიტეტებს დაეგზავნება.

რატომ არის მნიშვნელოვანი: ბიუროს სხდომის პარალელურად პარლამენტში მედიის წარმომადგენლები შევიკრიბეთ და ანტიდასავლური მოძრაობის ინიცირებული კანონპროექტი გავაპროტესტეთ.

• კანონის თანახმადაც შეიქმნება "უცხოური გავლენის აგენტების" რეესტრი, სადაც დარეგისტრირდება ყველა ის არასამეწარმეო იურიდიული პირი და მედიასაშუალება, რომელთა შემოსავლების 20 პროცენტზე მეტი ფინანსდება უცხოური ძალების მიერ.
• მსგავსი კანონი მოქმედებს რუსეთში — ქართველი დეპუტატების მსგავსად, ოკუპანტი ქვეყნის საკანონმდებლო ორგანო მის მიღებას მოქალაქეების ინტერესების, ქვეყნის უსაფრთხოებისა და სუვერენიტეტის "უცხოური გავლენებისგან" დაცვის მოტივით ხსნიდა, საბოლოოდ, კი თავისუფალი სიტყვის წინააღმდეგ გამოიყენა.
• მმართველი გუნდის წევრები ამ კანონს არ ემიჯნებიან, მეტიც მიიჩნევენ, რომ გამჭვირვალობა საჭიროა.
• 40 საერთაშორისო ორგანიზაცია პარლამენტს მოუწოდებს, არ მიიღოს "უცხოური გავლენის აგენტებზე" კანონი და აცხადებს, რომ ის იმეორებს ავტორიტარული სახელმწიფოების პრაქტიკას.
  ევროსაბჭოს საპარლამენტო ასამბლეა ეჭვქვეშ აყენებს ხალხის ძალის მიერ წარდგენილი კანონპროექტის თავსებადობას დემოკრატიულ და ადამიანის უფლებათა სტანდარტებთან.

ჟურნალისტები პარლამენტში შესვლისას დაბრკოლებას წააწყდნენ, რადგან მედიების დიდ ნაწილს მხოლოდ 2 ადამიანზე მისცეს საშვი. გარდა ამისა, შესვლისას დაცვის თანამშრომლებმა პოსტერების შეტანა დააბრკოლეს.

• პროტესტის მონაწილეები ბიუროს ოთახთან იყვნენ შეკრებილი და სკანდირებდნენ "არა რუსულ კანონს".
• ისინი მოუწოდებდნენ დეპუტატებს გამოსულიყვნენ დარბაზიდან, თუმცა სე არ მომხდარა.
• "თქვენ თვითონ ხართ აგენტები", "აგენტი თავი გაბიათ", "ჩვენ ჟურნალისტებად დავრჩებით", "მედია ცოცხალი და დამოუკიდებელია", — ამ და სხვა პოსტერებით ჟურნალისტები აცხადებდნენ, რომ მედიის შეზღუდვა და პუტინის კანონის გამოყენება დაუშვებელია.
• აქციაში მონაწილეობას იღებდნენ On.ge, ნეტგაზეთი, პუბლიკა, მთის ამბები, ქვიარი, ჟურნალისტური ეთიკის ქარტია, სტუდია მონიტორი და სხვა მედიის წარმომადგენლები.

რა მოხდა ბიუროზე: კანონპროექტზე საუბარი თეონა აქუბარდიამ დაიწყო და აღნიშნა, რომ პროექტს არ აქვს იურიდიული კომიტეტის დასკვნა კონსტიტუციასთან შესაბამისობის შესახებ.

• შალვა პაპუაშვილმა განმარტა, რომ პროექტს არა კომიტეტი, არამედ იურიდიული დეპარტამენტი განიხილავს მხოლოდ ტექნიკური ხასიათით და არა შინაარსით, შესაბამისად, კონსტიტუციურობაზე და მიზანშეწონილობაზე დასკვნას არ იძლევა.
• აქუბარდიამ იკითხა, განიხილავენ თუ არა, კანონი გაეგზავნოს ვენეციის კომისიას და მათი პასუხი მიიღონ.
• დავით უსუფაშვილმა განაცხადა, რომ ამ კანონში ამერიკული არაფერი არ არის და მანვე აღნიშნა, რომ ირაკლი კობახიძე საჯაროდ მხარს უჭერს ამ კანონპროექტს და ინიციატორებშიც უნდა იყოს მითითებული.
• იაგო ხვიჩიამ მედიის შემზღუდავი კანონი შეადარა პოლიტიკური ფინანსების გამჭვირვალობის წესს და განაცხადა, რომ "რაც ახლა ხდება ენჯეოშნიკებთან და მედიასთან მიმართებაში, ეს უკვე მოხდა პოლიტიკოსებთან და პარტიებთან მიმართებაში" — გირჩის ლიდერმა განაცხადა ისიც, რომ მათი ნაწილი ამ შეზღუდვებს იმსახურებს.
• "ბიუროს დღის წესრიგის საკითხები ამოწურულია და თუ სხვა საკითხები არ არის ბიუროს სხდომა დახურულია", — განაცხადა პაპუაშვილმა.