ამის შესახებ თურქეთში საქართველოს ელჩმა, გიორგი ჯანჯღავამ ისაუბრა.

რატომ არის მნიშვნელოვანი: თურქეთ-სირიის საზღვართან ორშაბათს დილით მომხდარ დამანგრეველ, 7,8-ბალიან მიწისძვრას ბოლო 2 დღის განმავლობაში ასზე მეტი განმეორებითი ბიძგი მოჰყვა, მათ შორის, 7 და 5-ბალიანები.

  • თურქეთსა და სირიაში მიწისძვრით დაღუპულთა რიცხვმა 16 000-ს გადააჭარბა.
  • ბოლო მონაცემებით, თურქეთში 12 873 ადამიანია დაღუპული, ხოლო სირიაში — 3 162.

დეტალები: თურქეთში საქართველოს ელჩი ამბობს, რომ იმ ადგილიდან, სადაც ერთ-ერთი მოქალაქე ელოდება, სიახლეებს ელოდებიან.

  • თურქეთში საქართველოს სამი მოქალაქე დაიღუპა — ერთ-ერთი მათგანი უკვე გადმოასვენეს საქართველოში და ოჯახს აქვს ინფორმაცია.
  • "ახლა ვმუშაობთ საქართველოს მოქალაქეებთან, ვინც იმ რეგიონებშია, ვიცოდეთ მათი ადგილსამყოფელი. სია გვქონდეს და რაც ჩვენ გაგვაჩნია, რომ დახმარება გავუწიოთ", — ამბობს ჯანჯღავა.

საგარეოს განცხადებით, საელჩო აქტიურად მუშაობს, სტიქიის ზონაში მყოფი მოქალაქეების უსაფრთხოდ გამოყვანის და მათი დახმარების ალტერნატიული გზების ძიებაზე.

  • "უნდა აღინიშნოს, რომ სტიქიის ზონაში, კვლავ შეფერხებულია თავისუფალი გადაადგილება, ხოლო ავტომაგისტრალებზე მიმდინარეობს აღდგენითი სამუშაოები";
  • "სტიქიის ზონის მიმართულებით თავისუფალი გადაადგილება შეუძლიათ მხოლოდ სამაშველო ჯგუფებსა და ჰუმანიტარული დახმარების კოლონებს";
  • ვითარებას კიდევ უფრო ამძიმებს რთული მეტეოროლოგიური პირობები, სიცივე და დიდთოვლობა. ყოველდღიურად იმატებს დაზარალებულთა და გარდაცვლილთა საერთო რიცხვი"
  • "თურქეთში საქართველოს საელჩო მუდმივ კონტაქტზე რჩება სტიქიის ზონაში მყოფ საქართველოს მოქალაქეებთან, მათი საჭიროებების დადგენის მიზნით", — აცხადებენ საელჩოში.