ინფორმაციას მედია ჩინეთის ხელისუფლებაზე დაყრდნობით ავრცელებს. მოსალოდნელია, რომ რეალური მონაცემები გაცილებით მაღალი იყოს.

რატომ არის მნიშვნელოვანი: ჩინეთმა კორონავირუსის ყოველდღიური სტატისტიკის წარმოება მას შემდეგ შეწყვიტა, რაც კოვიდის ნულოვანი ტოლერანტობის პოლიტიკა გაუქმდა.

• თუმცა არც მანამდე არსებული მონაცემები იყო სანდო — პანდემიის გავრცელების შემდეგ ქვეყანას სიკვდილის მხოლოდ 6 ათასამდე შემთხვევა ჰქონდა დადასტურებული.
• ბოლო კვირებში ადგილობრივ და საერთაშორისო მედიებში ვრცელდებოდა ინფორმაცია, რომ მორგები და კრემატორიუმები გადავსებული იყო, თუმცა ოფიციალური სტატისტიკა ამას არ ასახავდა.
• რიცხვების ნაკლებობა გამოწვეული იყო იმით, რომ ჩინეთში კოვიდით დაღუპულად მიიჩნევდნენ მხოლოდ იმას, ვინც სუნთქვის უკმარისობით და რესპირატორული პრობლემებით გარდაიცვალა.
• ჯანდაცვის მსოფლიო ორგანიზაციიამ განაცხადა, რომ ეს ძალიან ვიწრო განმარტება იყო და პეკინი კორონავირუსით გამოწვეული სიკვდილიანობის რაოდენობას არასრულად აწარმოებდა.
• მაგრამ ჩინეთის ხელისუფლებამ უპასუხა, რომ არ არის აუცილებელი ყოველი სიკვდილი კოვიდის მიაწერონ.

დეტალები: საერთაშორისო კრიტიკის ფონზე, მოულოდნელად სამედიცინო ადმინისტრაციის ბიუროს ხელმძღვანელმა შაბათს ახალი მონაცემები გააჟღერა — მხოლოდ 8 დეკემბრიდან 12 იანვრამდე პერიოდში 59 938 ადამიანი დაიღუპა.

• მისი განმარტებით, ეს მაჩვენებელი მოიცავს დაახლოებით 5 500 ადამიანს, რომლებიც სუნთქვის უკმარისობით დაიღუპნენ, ხოლო 54 435-ს კორონავირუსთან ერთად ჯანმრთელობის სხვა პრობლემები ჰქონდათ.
• ეს ციფრები მხოლოდ საავადმყოფოში გარდაცვლილებს ასახავს.

სხვა მონაცემები: პეკინის უნივერსიტეტმა ჩაატარა კვლევა, რომელიც 11 იანვრის მდგომარეობით თარიღდება — ანგარიშის მიხედვით, ქვეყანაში 900 მილიონი ადამიანია ინფიცირებული და ვირუსი მოსახლეობის 64%-ს აქვს.

• არაოფიციალური წყაროებით, შეზღუდვების მოხსნის შემდეგ, ზოგიერთ დიდ ქალაქში მოსახლეობის 70-90%-ა ინფიცირებული.
• ქვეყნის დაავადებათა კონტროლის ცენტრის ყოფილი ხელმძღვანელის ვარაუდით, COVID-19-ის პიკი, სავარაუდოდ, ორ-სამ თვეს გაგრძელდება.
• ოფიციალური პირები კი ამბობენ, რომ ბევრმა პროვინციამ და ქალაქმა უკვე გადალახა პიკი.

ეპიდემიოლოგები ვარაუდობენ, რომ დღესასწაულის შემდეგ კორონავირუსის შემთხვევების რაოდენობა მკვეთრად გაიზრდება.

• რადგან ჩინეთში 21 იანვარს არდადეგები იწყება, რაც მსოფლიოში ყველაზე დიდ ყოველწლიურ მიგრაციას ნიშნავს — 23 იანვარს მშობლიურ ქალაქებში ასობით მილიონი ჩინელი ჩავა მთვარის ახალი წლის აღსანიშნავად.
• საერთაშორისო ჯანდაცვის ექსპერტები მიიჩნევენ, რომ წელს ჩინეთში კოვიდთან დაკავშირებულ გარდაცვალებათა რაოდენობამ, შესაძლოა, მილიონს გადააჭარბოს.