ამის შესახებ ღარიბაშვილმა ელჩების კონფერენციაზე სიტყვით გამოსვლისას ისაუბრა.

რატომ არის მნიშვნელოვანი: ევროპულმა საბჭომ ასოცირებული ტრიოს ქვეყნებიდან მოლდოვასა და უკრაინას კანდიდატის სტატუსი, ხოლო საქართველოს ევროპული პერსპექტივა მიანიჭა.

  • სამივე ქვეყანას გადაეცა კონკრეტული რეკომენდაციები და მათი შესრულება დაევალათ. საქართველოს შემთხვევაში, კანდიდატის სტატუსის მინიჭების წინაპირობა სწორედ 12 რეკომენდაციის შესრულებაა.
  • პუნქტების შესრულების პროცესი არაერთხელ გააკრიტიკეს არასამთავრობო ორგანიზაციებმა.

დეტალები: ღარიბაშვილმა აქამდე უკვე არაერთხელ ნათქვამი გაიმეორა — განაცხადა, რომ რეფორმების გატარების კუთხით, საქართველო უკრაინასა და მოლდოვაზე, "გაცილებით წინ" იყო, თუმცა ეს პოლიტიკური გადაწყვეტილებაა.

  • "ღიად ითქვა, რომ უკრაინას მიენიჭა კანდიდატის სტატუსი, იმიტომ, რომ ომში იმყოფება ქვეყანა და ასევე, მოლდოვა ომთან გათანაბრებულ მდგომარეობად შეაფასეს", — თქვა მან.

ამის შემდეგ ღარიბაშვილმა წარმატება უსურვა ასოცირებული ტრიოს დანარჩენ ორ ქვეყანას და საუბარი ევროკავშირის რეკომენდაციების შესრულებაზე დაიწყო.

  • "მას შემდეგ, რაც განისაზღვრა 12 პრიორიტეტი, იმავე დღეს პრაქტიკულად ჩვენმა გუნდმა, მმართველმა პარტიამ საკმაოდ ნათელი საგზაო რუკა წარუდგინა ქართულ საზოგადოებას, მათ შორის, ჩვენს პარტნიორებს".

  • "მთელი გუნდი ჩართული იყო ამ პროცესში და ჩვენ ზედმიწევნით სწორად, ეფექტიანად შევასრულეთ აღნიშნული პრიორიტეტები, რეკომენდაციები".

არასამთავრობო ორგანიზაციების განცხადებით, ამ ეტაპზე მთავრობის მხრიდან კანდიდატის სტატუსის წინაპირობად წარდგენილი 12 პირობის სათანადო პოლიტიკური ნება და მზაობა არ ჩანს.