ამის შესახებ საფრანგეთის პრეზიდენტმა გადაცემა 60 წუთში ისაუბრა.

რატომ არის მნიშვნელოვანი: უკრაინაში სრულმასშტაბიანი შეჭრისა და ასეულობით ომის დანაშაულის გამო რუსეთი საერთაშორისო იზოლაციაში მოექცა.

  • უკრაინის კრიტიკულ ინფრასტრუქტურაზე შეტევისა და მსოფლიო სურსათის კრიზისის გამოწვევის გამო მსოფლიო ლიდერები სანქციების ახალ პაკეტებზე ალაპარაკდნენ.
  • მაკრონი თავადაც მოუწოდებს საერთაშორისო საზოგადოებას, დაიწყოს სამართლებრივი ინიციატივები რუსეთის პრეზიდენტის წინააღმდეგ სამოქალაქო ინფრასტრუქტურაზე ბოლო თავდასხმების გამო.

დეტალები: მაკრონი მიიჩნევს, რომ ისეთი პრეზიდენტის, როგორიც პუტინია, სრულ იზოლაციაში დატოვება არ შეიძლება.

  • "მე ყოველთვის ვინარჩუნებ რეგულარულ დისკუსიებს და პირდაპირ კონტაქტს პრეზიდენტ პუტინთან, რადგან მჯერა, რომ ურთიერთქმედების აღდგენის საუკეთესო გზა ამ პირდაპირი არხის შენარჩუნებაა. იზოლაცია ყველაზე ცუდი რამ არის, განსაკუთრებით ასეთი ლიდერისთვის", — განაცხადა მაკრონმა.
  • მისი შეფასებით, ომის კრიზისიდან გამოსვლის ერთადერთი გზა მოლაპარაკებების წარმოებაა.
  • მაკრონის სულისკვეთებას გერმანიის კაცლერი, ოლაფ შოლციც იზიარებს.
  • კვირას, ვლადიმერ პუტინთან სატელოფონო საუბრის შემდეგ შოლცმა განაცხადა, რომ "პუტინთან მოლაპარაკებების სრულად შეწყვეტა სერიოზული შეცდომა იქნებოდა".

ამასთანავე, მაკრონს პუტინთან მოლაპარაკების მცდელობების ხანგრძლივი გამოცდილება აქვს.

  • რუსეთ-უკრაინის ომამდე იგი მოსკოვში გაფრინდა, რათა პუტინს პირისპირ შეხვედროდა და უკრაინაში შეჭრა გადაეფიქრებინა.
  • მას შემდეგ იგი დაჟინებით მოითხოვს მოსკოვთან დიალოგის შენარჩუნებას.
  • საფრანგეთის პრეზიდენტმა, მოლაპარაკებების პარალელურად რუსეთისთვის გარკვეული უსაფრთხოების გარანტიების საჭიროებებზეც ისაუბრა.
  • უკრაინის ეროვნული უსაფრთხოებისა და თავდაცვის საბჭოს მდივანმა, ოლექსი დანილოვმა ეჭვქვეშ დააყენა უსაფრთხოების გარანტიების მიწოდება "ტერორისტული და მკვლელი სახელმწიფოსთვის".

კონტექსტი: ეს არ არის პირველი განხეთქილება კიევსა და პარიზს შორის კრემლთან შესაძლო მოლაპარაკებების გამო.

  • ზელენსკიმ მაისში განაცხადა, რომ მაკრონმა უკრაინას სთხოვა თავისი სუვერენიტეტი დაეთმო, რათა პუტინს სახის გადარჩენაში დახმარებოდა.
  • მაშინ პარიზმა ზელენსკის ბრალდებები უარყო, და ხაზგასმით აღნიშნა, რომ მაკრონს ზელენსკისთვის რაიმე დათმობა არასდროს უთხოვია.