წიგნის მოყვარულებისთვის უდიდესი დღესასწაული ბრუნდება!

თბილისის წიგნის დღეები 4-5-6 ნოემბერს, უცვლელ ადგილას, ექსპოჯორჯიას მე-11 პავილიონში გაიმართება და დამთვალიერებელს ძალიან ბევრ სიახლეს გააცნობს.

რა თქმა უნდა, წიგნის დღეების უცვლელი მონაწილე იქნება ქარჩხაძის გამომცემლობა.

სწორედ ქარჩხაძის გამომცემლობის წლევანდელი სიახლეების შესახებ გაიგებთ ამ სტატიაში და იქნებ, დაგეხმაროთ კიდეც არჩევანის გაკეთებაში.

ეიფორია — ლილი კინგი

ახალგაზრდა ცოლ-ქმარი 1930-იან წლებში ახალი გვინეის ჯუნგლებში ჩადის ადგილობრივი ტომების შესასწავლად. ნელი ნიჭიერი და ცნობილი ანთროპოლოგია, რომელიც აბორიგენებთან დაახლოებას სიყვარულითა და თანაგრძნობის უნარით ახერხებს. ფენი გამჭრიახი და თავზეხელაღებული მკვლევარია, მაგრამ ცოლის ჩრდილიდან თავდასაღწევად საბედისწერო ექსპედიციას გეგმავს. მათი ცხოვრება თავდაყირა დგება, როდესაც ბრიტანელ მეცნიერს, ენდრიუ ბენკსონს გადაეყრებიან. ბენკსონი გონიერი, მაგრამ სასოწარკვეთილი კაცია, რომელიც ამ უცნაურ წყვილთან დაახლოების შემდეგ თვითმკვლელობაზე უარს ამბობს და ეიფორიით შეპყრობილი აგრძელებს მუშაობას ჯუნგლებში. ტრიოს ურთიერთობა თვალისმომჭრელ, ფერად ფონზე ვითარდება. შორეული ადგილებისა და უცნაური პერსონაჟების მიუხედავად წიგნი ისეთ საყოველთაო თემებს ეხება, როგორიცაა ლტოლვა, ამბიცია და არჩევნის დილემა.

ცეცხლოვანი დაღი — ცაო ვენსიუენი

თანამედროვე ჩინელი მწერალი, ცაო ვენსიუენი, პირველი ჩინელი ავტორია, რომელსაც ჰანს ქრისტიან ანდერსენის პრემია აქვს მიღებული. პეკინის უნივერსიტეტის პროფესორი და პეკინის მწერალთა ასოციაციის ვიცე-პრეზიდენტი, ცაო ვენსიუენი, ძირითადად ბავშვების ცხოვრებასა და იმ სირთულეებსა თუ განცდებზე მოგვითხრობს, რომელთა გამკლავებაც მათ ცხოვრების მანძილზე უწევთ. მიღებული აქვს 30-ზე მეტი ლიტერატურული პრემია, თარგმნილია მრავალ ენაზე.

ჩინეთის ჩრდილოეთით მდებარე პატარა სოფელში მცხოვრები ფოვასა და მისი ოჯახის ცხოვრება უკეთესობისკენ მას შემდეგ შეიცვლება, რაც მგლის ხროვისგან თოვლივით თეთრ კვიცს, სიუეერს, გამოიხსნიან. სიუეერი, ერთი მხრივ, წიგნის პერსონაჟია, მეორე მხრივ კი, ადამიანური ბუნების საზომი. ყველაფერი თავდაყირა კი მას შემდეგ დგება, რაც იეხუს ხეობაში იაპონური არმია შეიჭრება. არმია ცხენს გაიტაცებს, რომელსაც თავისი სამშობლოს წინააღმდეგ ბრძოლას აიძულებენ. წიგნში ემოციურადაა გადმოცემული ომში მყოფი ადამიანებისა და ბავშვების განცდები, და მაღალი ადამიანური ღირებულებებითაა გამსჭვალული.

ქართული მწერლობა

სასკოლო გამოცემა — "ძველი ქართული მწერლობა" წარმოადგენს სასკოლო სამტომეულის, "ქართული მწერლობის", პირველ ტომს. წიგნი აერთიანებს ჰაგიოგრაფიული, ისტორიული და მხატვრული პროზის, ჰიმნოგრაფიის, საერო პოეზიის ნაწარმოებებსა და მონაკვეთებს. ძველი ქართული მწერლობა V საუკუნიდან XIX საუკუნემდე: იაკობ ხუცესიდან ბესიკამდე, სულხან-საბა ორბელიანი და გურამიშვილი, მოსე ხონელი, ჩახრუხაძე და სხვანი. წიგნში თავმოყრილია ფართო საზოგადოებისთვის როგორც კარგად ნაცნობი, ისე შედარებით მივიწყებული ნაწარმოებები — შუშანიკის წამება, გრიგოლ ხანძთელის ცხოვრება, დავითიანი, აბდულმესიანი, თამარიანი, მოგზაურობა ევროპაში, ამბავი რვათა ძმათა და სხვ. პროზაული ნაწარმოებები თანამედროვე ქართულითაა გადმოცემული. წინამდებარე გამოცემა დაეხმარება ფართო საზოგადოებას ძველი ქართული ტექსტების უკეთ გაგებასა და გააზრებაში.