კონკურსი ევროკავშირის პროექტის, ქალების ძალა — ეკონომიკური და პოლიტიკური მონაწილეობა ინკლუზიური საზოგადოებისთვის საქართველოში და გერმანიის საგარეო საქმეთა სამინისტროს პროექტის, ქალები და მათი უფლებები: ეთიკური მედია კავკასიაში ფარგლებში იმართება.

რატომ არის მნიშვნელოვანი: კონკურსის მიზანი გენდერულად თანასწორი და ინკლუზიური საზოგადოების მშენებლობაში ეთიკური მედიის, მულტიმედიისა და სოციალური მედიის პლატფორმების მნიშვნელობის ხაზგასმა და ამით საქართველოში გენდერული თანასწორობის ხელშეწყობაა.

• "სწორედ ამიტომ, კონკურსი წაახალისებს და მხარს დაუჭერს ქალთა და სხვა მოწყვლადი ჯგუფების გაძლიერების მიმართულებით შექმნილ საუკეთესო ნამუშევრებსა და მათ ავტორებს".
• #მედიათანასწორობის კონკურსის მიზანია, ასევე, ისიც, რომ წესრიგში დადგეს გენდერული თანასწორობის იდეის მნიშვნელობა ჟურნალისტების, ფოტოგრაფების, ბლოგერების, სოციალურ მედიაში კონტენტის შემქმნელებისა და ჟურნალისტიკის სტუდენტების საქმიანობაში.

დეტალები: ჯილდოს მისაღებად კონკურსი 6 კატეგორიაში ცხადდება, თითოეულში კი ის ნამუშევარი გაიმარჯვებს, რომელიც გენდერულად მგრძნობიარე თხრობის სტილით გამოირჩევა და მიზნად ისახავს და ხელს უწყობს მრავალფეროვნებისა და ინკლუზიურობის იდეის დღის წესრიგში დაყენებას.

• ასევე, გენდერულ საკითხებზე ცნობიერების ამაღლებასა და არსებული გამოწვევებისა და პრობლემების სისტემურ ჭრილში ჩვენებას.
• კონკურსის პირობების მიხედვით, თითოეულ კატეგორიაში გამოგზავნილი საკონკურსო ნამუშევარი 2021 წლის 11 ნოემბრიდან 2022 წლის 31 ოქტომბრამდე უნდა იყოს გამოქვეყნებული.
• განცხადების შეტანის ბოლო ვადა კი 2022 წლის 31 ოქტომბერია.

პრიზი: კონკურსს თითოეულ კატეგორიაში 3 გამარჯვებული — თანასწორობის ჩემპიონი ეყოლება.

• I ადგილზე გასული ნამუშევრის ავტორი მიიღებს 900 ევროს ექვივალენტს ლარში;
• II ადგილზე გასულს 500 ევროს ექვივალენტი ლარში გადაეცემა.
• III ადგილოსანი კი 300 ევროთი დაჯილდოვდება.
• "თითოეული ნომინანტი ჩვენგან მიიღებს საჯარო დაფასებას, ქალების გაძლიერებასა და მედიის გაუმჯობესებაში შეტანილი მნიშვნელოვანი წვლილისთვის", — აცხადებს ორგანიზაცია.

საკონკურსო კატეგორიები: საუკეთესო ცენტრალური მედიაპროდუქტი — ცენტრალურ მედიაში მომუშავე ჟურნალისტების შექმნილი სატელევიზიო სიუჟეტი, რადიორეპორტაჟი, ციფრული მედიაპროდუქტი;

• საუკეთესო რეგიონული მედია პროდუქტი — რეგიონულ მედიაში მომუშავე ჟურნალისტის მიერ შექმნილი სატელევიზიო სიუჟეტი, რადიო რეპორტაჟი, სტატია, ციფრული მედიაპროდუქტი;
• საუკეთესო ვიზუალური ნამუშევარი — კედლის მხატვრობა, ფოტოამბავი, ინსტალაცია და სხვა;
• საუკეთესო ციფრული პლატფორმა — ქალთა და გენდერულ საკითხებზე ორიენტირებული სოციალური მედიისა და ციფრული პლატფორმები (არ გულისხმობს სატელევიზიო თუ ონლაინმედიების სოციალურ და ციფრულ პლატფორმებს);
• საუკეთესო დამოუკიდებელი/ინდივიდუალური კონტენტის შემქმნელი სოციალურ მედიაში (აპლიკანტი საკუთარ პლატფორმას უნდა იყენებდეს თანასწორობის იდეის გასავრცელებლად);
• საუკეთესო სტუდენტური ჟურნალისტური პროდუქტი — აპლიკაციის გამოგზავნა შეუძლიათ, ჟურნალისტიკის ან სხვა რელევანტური ფაკულტეტები სტუდენტებს და მიიღება სატელევიზიო სიუჟეტი, სტატია, ვიდეოსიუჟეტი, პოდკასტი, რადიო გადაცემა და ა.შ, რომელიც გამოქვეყნებული იქნება ნებისმიერ სტუდენტურ ან სხვა მედიაპლატფორაზე.

პრიორიტეტული თემები: ომი და მისი გენდერული ასპექტები;

• ინკლუზიური საკითხების გაშუქება.

გასულ წელს კონკურსში On.ge-ს ჟურნალისტებმა, თამთა კახაბერიძემ და მარიამ ქავთარაძემ გაიმარჯვეს და თანასწორობის ჩემპიონების ჯილდო მიიღეს.

• კატეგორიაში, საუკეთესო ეროვნული/ნაციონალური მულტიმედია პროდუქტი, მოხვედრილი სამი ფინალისტიდან 2 On.ge-ის ჟურნალისტი იყო.
• გამარჯვებული მასალა შეგიძლიათ იხილოთ აქ.
• ხოლო, სხვა გამარჯვებულების შესახებ ინფორმაცია შეგიძლიათ ნახოთ აქ.