ენმ-ის წევრი ხარაგაულში, მერიაში მივიდა კითხვით, თუ რატომ დაენიშნათ სოციალური დახმარება საკრებულოს თავმჯდომარის მოადგილის, დავით კიკნაძის შვილებს.

რატომ არის მნიშვნელოვანი: ხაბეიშვილმა ამის შესახებ ინფორმაცია 3 ოქტომბერს გაავრცელა და სოციალურ ქსელში დაწერა, რომ კიკნაძეს თვიური დეკლარირებული შემოსავალი 3 000 ლარზე მეტი აქვს, ხოლო მისი ცოლი მერიის თანამშრომელია.

• მისივე ინფორმაციით, კიკნაძემ 2021 წელს ქართულ ოცნებას 5 000 ლარი შესწირა.
• ამ საკითხის განხილვას კონფლიქტი მოჰყვა — სხვადასხვა მედიის მიერ გავრცელებულ კადრებში ჩანს, რომ ადგილზე სიტყვიერი და ფიზიკური დაპირისპირება იყო.

დეტალები: თავდაპირველად ხაბეიშვილი ხარაგაულის სოციალური მომსახურების სააგენტოს ხელმძღვანელის, კიაზო გამრეკელაშვილის კაბინეტში შევიდა. სოციალურ დახმარებაზე დასმულ კითხვას კი მათ შორის კონფლიქტი მოჰყვა.

• "თქვენ ხართ მიკერძოებული, ქართული ოცნების მაჟორიტარი, ამ პარტიის წევრი ხართ და შესაბამისად, სოციალურ დახმარებასაც, დოკუმენტურად დადასტურებულია, რომ გასცემთ ამ ნიშნით", — განაცხადა ხაბეიშვილმა.
• პასუხად, გამრეკელაშვილმა ბრალდებები უარყო და ხაბეიშვილს მოუწოდა კითხვებისთვის პრესცენტრისთვის მიემართა.
• "კანონიერად მაქვს გაკეთებული ყველაფერი [...] თქვენ ტყუილებს ლაპარაკობთ".

კითხვაზე, აქვს თუ არა კიკნაძეს ხელფასი 3 000 ლარი, გამრეკელაშვილი ამბობს, რომ ახლა აქვს, "იმ დროს არ ჰქონდა, როდესაც დეკლარაცია გაიგზავნა".

• "ბავშვი რომ ავად არის რა თანხები სჭირდება [...] სამი შვილი ჰყავს და მიეცა პროგრამულად, პროგრამულად გადაითვალა ყველაფერი".

უფრო ვრცლად: დაპირისპირება შენობის გარეთაც გაგრძელდა. ხაბეიშვილთან საკრებულოს თავმჯდომარე, მანანა ბარბაქაძე მივიდა და მას ომის პარტიის წარმომადგენელი უწოდა.

• კადრებში ჩანს, საკრებულოს თავმჯდომარე მას ხელით შეეხო, რაზეც ხაბეიშვილმა უთხრა: "მაგიტომ მოგიყვანეს, რომ ქალი ხართ და ამას აკეთებთ?!"
• ბარბაქაძემ და ადგილზე შეკრებილებმა ოპოზიციონერს ტერიტორიის დატოვება აიძულეს. მან ენმ-ის წევრს სექსისტური, შეურაცხმყოფელი ფრაზებით მიმართა.
• "ჩანჩურა კურდღელო, შენ თუ კაცი ხარ, რად გინდა დაცვა".
• ბარბაქაძემ შეურაცხმყოფლად მიმართა TV პირველის ჟურნალისტსაც და უთხრა, "მიდი, დაახვიე".
• რაც შეეხება სოციალურ დახმარებას, საკრებულოს თავმჯდომარე ამბობს, რომ კიკნაძემ ის კანონიერად მიიღო.

ხაბეიშვილი ფორმულასთან აცხადებს, რომ თავდასხმა ორგანიზებული იყო. მისივე თქმით, გამრეკელაშვილთან დაკავშირებით შესაბამის სამართლებრივ ღონისძიებებს გაატარებს.

• "ეს ორგანიზება გაუკეთეს ყველა იმ ადამიანს, ვინც ქურდობაში და წურბელობაში ჰყავთ ჩართული და უთხრეს, დღეს თუ არ დაიცავთ ამ სააგენტოს ხელმძღვანელს, თქვენს მაჟორიტარს და საკრებულოს თავმჯდომარის მოადგილეს, ხვალ თქვენთან მოვა ხაბეიშვილი".