სახალხო დამცველმა ევროპული საბჭოს პრეზიდენტის, შარლ მიშელის კაბინეტის ხელმძღვანელისგან, ფრედერიკ ბერნარდისგან საპასუხო წერილი მიიღო.

რატომ არის მნიშვნელოვანი: საქართველო ერთადერთი აღმოჩნდა ასოცირებულ ტრიოს შორის, ვინც კანდიდატის სტატუსის ნაცვლად რეკომენდაციები მიიღო, რომელთა შესრულების შემთხვევაში, კომისია სამომავლო სტატუსზე იმსჯელებს.

  • რეკომენდაციებს შორის ერთ-ერთი მთავარი დეპოლარიზაცია და დეოლიგარქიზაცია იყო, თუმცა ოპოზიცია და მმართველი გუნდი იმაზეც ვერ შეთანხმდნენ, ვინ არის ოლიგარქი და როგორ უნდა იმუშაონ რეკომენდაციებზე.

წერილში ნათქვამია, რომ 24 ივნისს მიღებული დასკვნებით, ევროპულმა საბჭომ გამოიხატა მზადყოფნა, მიანიჭოს საქართველოს კანდიდატის სტატუსი, როგორც კი დასკვნაში ჩამოთვლილი პრიორიტეტები შესრულდება.

  • "ნება მიბოძეთ განვმარტო, რომ ევროპის საბჭომ ერთმნიშვნელოვნად აღიარა საქართველოს ევროპული პერსპექტივა და კიდევ ერთხელ დაადასტურა, რომ ქვეყნისა და მისი მოქალაქეების მომავალი ევროპაშია".

გარდა ამისა, აღნიშნულია, რომ EU საქართველო-ევროკავშირის ურთიერთობების კიდევ უფრო გაღრმავების ერთგული რჩება.

  • ომბუდსმენის ცნობით, ბერნარდმა ხაზი გაუსვა სახალხო დამცველის აპარატის როლსა და მნიშვნელობას ქვეყანაში კანონის უზენაესობის რეფორმების განხორციელების საქმეში და მადლობას უხდის მას გაწეული შრომისთვის.

არქივიდან: 2022 წლის 22 ივნისს მიშელისადმი გაგზავნილ წერილში ომბუდსმენმა თხოვნით მიმართა ევროპულ საბჭოს პრეზიდენტს, ევროკავშირის წევრ ქვეყნებს, გაითვალისწინონ ქართველი ხალხის მისწრაფება ევროპული ოჯახისკენ.

  • ასევე, მიანიჭოს საქართველოს კანდიდატის სტატუსი, რათა "საქართველო არ მოწყდეს იმ საერთო სივრცეს, რომელშიც დღემდე უკრაინასა და მოლდოვასთან ერთად მოიაზრება".