ჩეხეთმა, რომელიც ამჟამად ევროკავშირის თავმჯდომარეა, აღნიშნა რომ მიღწეულია "პოლიტიკური შეთანხმება".

რატომ არის მნიშვნელოვანი: როგორც DW წერს, სანქციების უახლეს პაკეტში ყველაზე მნიშვნელოვანი მოვლენაა რუსულ ნავთობზე ფასების ლიმიტის დაწესება.

  • გამოცემა წერს, რომ ასეთი ლიმიტის ამოქმედებით, ევროკავშირი იმედოვნებს, რომ მოსკოვს აიძულებს თავისი ნავთობი საზღვარგარეთ უფრო იაფად გაყიდოს;

  • რაც შეამცირებს რუსეთის ენერგეტიკულ მოგებას. უკრაინის მთავრობა ამბობს, რომ კრემლი ენერგორესურსებს ომის დასაფინანსებლად და ევროპის შანტაჟისთვის იყენებს.

დეტალები: პაკეტი ჯერ კიდევ უნდა გაიაროს საბოლოო დამტკიცების პროცესი. სანქციები ხუთშაბათს გამოქვეყნდება და ძალაში შევა.

  • ახალი პაკეტით აიკრძალება IT, საინჟინრო და იურიდიული მომსახურების მიწოდება "რუსულ სუბიექტებზე".
  • სანქციები გაფართოვდება იმპორტირებული საქონლის ნაწილში — აიკრძალება ფოლადის ნაწარმის, ხის მერქნის, ქაღალდის, მანქანებისა და მოწყობილობების, ქიმიკატების, პლასტმასის, სიგარეტის და ა.შ. შემოტანა.
  • "პაკეტი მოიცავს: რუსული ნავთობის საზღვაო ტრანსპორტირების აკრძალვას მესამე ქვეყნებში ნავთობის ფასის ლიმიტის ზემოთ და დაკავშირებული სერვისების აკრძალვას", — ნათქვამია ჩეხეთის განცხადებაში.

შეფასებები პაკეტზე: ევროკომისიის პრეზიდენტმა, ურსულა ფონ დერ ლაიენმა დაწერა, რომ სანქციების ახალ პაკეტზე შეთანხმებას მიესალმება.

  • "ჩვენ არასოდეს მივიღებთ პუტინის მოჩვენებით რეფერენდუმს და არც რაიმე სახის ანექსიას უკრაინაში", — დაწერა მან.
  • ლიეტუვას საგარეო საქმეთა მინისტრმა გაბრიელიუს ლანდსბერგისმა გააკრიტიკა ბოლო პაკეტში შეტანილი გამონაკლისების რაოდენობა.

  • "ძლიერი პაკეტების დრო დასრულდა და წარდგენილი დოკუმენტების კითხვისას, ზოგჯერ იქმნება შთაბეჭდილება, რომ უფრო მეტი გამონაკლისი არსებობს, ვიდრე სანქციები", — ამბობს ის.

  • "მიუხედავად ამისა, ეს სჯობს არაფერს", — თქვა მან და დასძინა: "ჩვენ პროგრესს ვაღწევთ, თუმცა საკმაოდ სუსტად".