პარლამენტში ერთობლივი განცხადება თეონა აქუბარდიამ, ხატია დეკანოიძემ, თამარ კორძაია, ხათუნა სამნიძემ, ანა ბუჩუკურმა და ანა წითლიძემ გააკეთეს.

რატომ არის მნიშვნელოვანი: მას შემდეგ რაც პუტინმა რუსეთში სამხედრო მობილიზაცია გამოაცხადა, ისაუბრა "რეფერენდუმზეც, რომელიც მათ მიერ ოკუპირებულ ტერიტორიებზე არის დაგეგმილი.

  • "რეფერენდუმი" უკვე რამდენჯერმე გადაიდო, მაშინ ოფიციალური მიზეზი არ იყო ცნობილი, თუმცა Meduza-ს წყაროებმა უკრაინის წარმატებული კონტრშეტევა დაუსახელეს.
  • ომის შემსწავლელმა ინსტიტუტმა ბოლო ანგარიშში განაცხადა, რომ უკრაინის კონტრშეტევა კრემლს პანიკაში აგდებს — მათი თქმით, დონეცკისა და ლუგანსკის ე.წ. სახალხო რესპუბლიკების მარიონეტული ორგანოები მათ ხელმძღვანელობას მოუწოდებენ, რომ რეგიონებში სასწრაფოდ ჩაატარონ ე.წ. რეფერენდუმები.

დეპუტატები აღნიშნავენ, რომ იმ ფონზე, როდესაც ქვეყნის 20% ოკუპირებულია, რუსეთი ანექსიისკენ ნაბიჯების გადადგმას აგრძელებს. ხაზს უსვამენ იმას, რომ ე.წ რეფერენდუმის ჩატარება რუსეთს ცხინვალის რეგიონშიც სურდა.

  • მათი თქმით, მთავრობამ ქვეყნის ინტერესებიდან გამომდინარე უნდა იმოქმედოს, შეაფასოს და დაგმოს რუსეთის მორიგი უკანონო ქმედება.
  • "უნდა ვიყოთ ერთიანები ცივილიზებულ სამყაროსთან ერთად. წინააღმდეგ შემთხვევაში, დუმილი, რომელიც დღემდე არის მთავრობის მხრიდან, აღქმული იქნება, როგორც ჩუმი თანხმობა", — აცხადებენ ისინი.