გადაწყვეტილება სოხუმის ე.წ. სასამართლომ დე ფაქტო უსაფრთხოების სამსახურის გამომძიებლის შუამდგომლობის საფუძველზე 16 სექტემბერს მიიღო და ქრისტინა თაკალანძეს აღკვეთის ღონისძიების სახით პატიმრობის ვადა 2 თვით გაუხანგრძლივა.

რატომ არის მნიშვნელოვანი: საოკუპაციო რეჟიმის წარმომადგენლებმა ის გალში, სოფელ ნაბაკევში 20 ივლისს დააკავეს.

  • ეს პირველი შემთხვევა არაა, როდესაც საოკუპაციო რეჟიმი როგორც აფხაზეთის, ისე ცხინვალის რეგიონის ტერიტორიების მიმდებარედ საქართველოს მოქალაქეებს იტაცებს ან უკანონოდ აპატიმრებს.
  • ოკუპირებულ რეგიონებში ციხეებში ხშირად ირღვევა ადამიანის უფლებები.

დეტალები: საოკუპაციო რეჟიმმა გაავრცელა დაკავების კადრები, რომლებშიც ჩანდა, რომ ჩხრეკენ ქალის პირად ნივთებს, პირადობის და ქორწინების მოწმობას, ბანკის პლასტიკურ ბარათებს და წერილებს, რომლებშიც ძირითადად პირადი შინაარსის კომუნიკაციაა.

  • იყო კიდევ ერთი ნახევრად დამწვარი წერილის კადრი, რომელშიც გაუმართავი ქართულით ჯაშუშობასთან დაკავშირებული ფრაზები ეწერა, თუმცა მისი შინაარსი აჩენდა ეჭვს, რომ გაყალბებული იყო.
  • დე ფაქტო უწყება ამბობს, რომ ის გალის მკვიდრია, რომელიც "სახელმწიფო და სამხედრო" ინფორმაციას აგროვებდა და საქართველოს სპეცსამსახურებს გადასცემდა.
  • სუს-ში ამბობდნენ, რომ გასათავისუფლებლად აქტიური მუშაობა მიმდინარეობს.

გარდა ამისა, სუს-ში აცხადებდნენ, რომ გააქტიურებული იყო ცხელი ხაზი და ინფორმირებული იყვნენ ევროკავშირის სადამკვირვებლო მისიის წარმომადგენლები და ჟენევის დისკუსიების თანათავმჯდომარეები.