ბევრ ადამიანში ტარაკანის დანახვაც კი უსიამოვნო შეგრძნებას იწვევს, თუმცა, ახალზელანდიელი ზეინ უედინგი ალბათ ვერც წარმოიდგენდა, სწორედ ამ მოუსვენარი მწერის დამსახურება იყო, რომ მთელი სამი დღე ყური ეღიტინებოდა.

უედინგი, რომელიც ოკლენდში ცხოვრობს, ერთ საღამოს აუზიდან შინ დაბრუნდა და დივანზევე დაიძინა. მეორე დღეს მას დაგუბებული ყურით გაეღვიძა და თავიდან იფიქრა, ალბათ ყურში წყალი ჩამივიდაო. თუმცა, საეჭვო იყო, წყლის წვეთებს ისე ეცმუკათ, რომ ღიტინის შეგრძნება გამოეწვიათ.

მომდევნო დღეს უედინგს ყურში სითხე ჩაუწვეთეს, ანტიბიოტიკები მისცეს და ურჩიეს, რომ თავის ერთი ნაწილისთვის თმის საშრობი ფენი მიეშვირა, ხოლო თუკი ის რაღაც ცმუკვას განაგრძობდა, გააფრთხილეს, რომ დაბრუნებულიყო.

"ინსტრუქციის შესრულებისთანავე უარესი გრძნობა გამიჩნდა", — ამბობს უედინგი, რომელმაც იმ ღამით ცალ ყურში სმენა დაკარგა და ვერ დაიძინა. ვერც თმის საშრობმა უშველა — ხუმრობს, მთელი ორი დღე ტარაკანს ფენით ვაცხობდიო.

საბოლოოდ, უედინგმა ყურის ექიმთან მისვლა გადაწყვიტა და სწორედ მაშინ გაირკვა, რომ ყურში, რეალურად, მწერი ჰყოლია. შემწოვი მანქანით და პინცეტით, რამდენიმე წუთში პაციენტის ყურიდან უკვე მკვდარი ტარაკანი ამოიღეს.

უედინგმა მწერი სახსოვრად ექიმს დაუტოვა, რომელსაც, როგორც ჩანს, მანამდე მსგავსი შემთხვევა არ უნახავს.