ნაციონალური მოძრაობის წევრი, ეკა ხერხეულიძე აცხადებს, რომ მიხეილ სააკაშვილი გამოთქვამს თანამშრომლობის სურვილს ნებისმიერ გარემოში, ეს იქნება საპატრიარქო, პრეზიდენტის ადმინისტრაცია, გორის ჰოსპიტალი თუ სხვა.

"მას შეუძლებლად მიაჩნია ტექნიკურად განხორციელდეს ეს, ვინაიდან მისი პირობები ყველასთვის ცნობილია. ის არის პატიმრობაში, მას არ აქვს გადაადგილების შესაძლებლობა. მან არ იცის, როგორ უნდა მოგვარდეს ეს ტექნიკური დეტალები. თუ მოგვარდება მის გარეშე, ცხადია, სადაც სთხოვენ შეხვედრას არანაირი წინაპირობა არ აქვს სხვა, გარდა მზაობისა და ის გამოთქვამს თანამშრომლობის სურვილს ნებისმიერ გარემოში, ეს იქნება საპატრიარქო, ეს იქნება პრეზიდენტის ადმინისტრაცია, ეს იქნება გორის ჰოსპიტალი, თუ ნებისმიერი ლოკაცია, ოღონდ დასრულდეს ეს დაპირისპირება, დასრულდეს ის მტრობა, რაც დღეს ქვეყანაში არსებობს და დაპირისპირებული მხარეები დასხდნენ სასაუბროდ", — განაცხადა ხერხეულიძემ.

მისივე თქმით, ექსპრეზიდენტმა ეკლესიასთან დაკავშირებითაც დააფიქსირა პოზიცია, ყველას მადლობას უხდის და ფიქრობს, რომ ეს ინიციატივა დროულად უნდა განხორციელდეს.

"მან, ასევე, თავის პოზიცია დააფიქსირა პრეზიდენტ მარგველაშვილთან დაკავშირებით, ასევე, დღეს მისი პოზიცია გახლავთ ეკლესიასთან მიმართებაში, ყველას მადლობას უხდის და ფიქრობს, რომ დროულად უნდა განხორციელდეს ყველა ის ინიციატივა, რომელიც ამ დღეების განმავლობაში გაჟღერდა და მოქმედებაში მოიყვანოს ნებისმიერმა ინიციატორმა თავისი ინიციატივა, ვინაიდან ძალიან აგვიანდება ქვეყანას და ძალიან მნიშვნელოვანია ეს პროცესი მალე დაიწყოს. ესაა მისი პოზიცია", — თქვა ენმ-ის წევრმა.

ეროვნულ თანხმობაზე პრეზიდენტის განცხადებას გამოეხმაურა ბოდბელი ეპისკოპოსი იაკობიც. 13 დეკემბერს, ქადაგებისას მან, ფაქტობრივად, ეკლესიის სივრცე შესთავაზა "შესარიგებლად".

"მე გამიხარდა, ცალკეულმა პარტიებმა, აი, თუნდაც პრეზიდენტის გამოხმაურება, მაგრამ თუ არა ეკლესიაში, შანსი არ არის ჩვენი შერიგების. ეს ყველამ კარგად ვიცოდეთ. იმიტომ, რომ ეკლესიაში შერიგება ნიშნავს იმას, რომ ჩვენ ერთმანეთის ღირსებას გავუფრთხილდებით. დღეს არ ვუფრთხილდებით ერთმანეთის ღირსებას", — განაცხადა ეპისკოპოსმა.

მეუფე იაკობმა ქადაგებისას რამდენჯერმე ხაზგასმით აღნიშნა, რომ შეუძლია ტყუილ-მართლის გარჩევა, მაგრამ არ აპირებს რომელიმე მხარეს დადგეს.