ნაციონალური მოძრაობის წევრი თინა ბოკუჩავა გორის სამხედრო ჰოსპიტალში ექსპრეზიდენტ მიხეილ სააკაშვილის მონახულების შემდეგ მედიასთან აცხადებს, რომ სააკაშვილი ძალიან სუსტადაა. ბოკუჩავას თქმით, მესამე პრეზიდენტის სისუსტე ყოველგვარი სამედიცინო კვალიფიკაციის გარეშეც შესამჩნევია.

"მას უჭირს გადაადგილება ერთ ოთახში იმ მცირე მონაკვეთზე. ამან განაპირობა მათ შორის ის, რომ მან ვერ შეძლო რომ წასულიყო სასამართლო სხდომაზე და ბუნებრივია ეს არის ძალიან შემაშფოთებელი. სამწუხაროდ, არ ვიცი საერთოდ რამდენად შესაძლებელია" — განაცხადა ბოკუჩავამ.

მიხიელ სააკაშვილის სისუსტეზე საუბრობდა გუშინ, 9 დეკემბერს ექსპრეზიდენტის დედა გიული ალასანია. სააკაშვილის პირადმა ექიმმა, ნიკოლოზ ყიფშიძემაც აღნიშნა, რომ მესამე პრეზიდენტი თავს სუსტად გრძნობს და ასევე ნევროლოგიური დეფიციტი შეინიშნება.

ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს.

4 დეკემბერს მარიამ ჯიშკარიანმა განაცხადა, რომ სააკაშვილი ფსიქოტროპულ მედიკამენტებს იღებდა. ჯიშკარიანის განცხადებით, მიხეილ სააკაშვილის სამედიცინო ბარათიდან არ ირკვევა, რატომ იღებდა ექსპრეზიდენტი ნეიროლეპტიკურ პრეპარატს. მისი თქმით, სააკაშვილმა იცოდა, რომ საძილე მედიკამენტს იღებდა.