დმანისში, ორი დღის განმავლობაში გაუჩინარებული დეპუტატის, რამიზ რამაზანოვის საკრებულოს სხდომაზე გამოცხადების შემდეგ, თავმჯდომარედ ქართული ოცნების დეპუტატი, პაატა ყულიაშვილი აირჩიეს.

სხდომაზე რამაზანოვი მოადგილედ აირჩიეს. ის ამბობს, რომ დამოუკიდებელი დეპუტატი იქნება, მასზე ზეწოლას კი არ ადასტურებს.

"არც ერთი ზეწოლა არ იყო, არაფერი არ იყო. უბრალოდ ჩვენი დმანისი უკვე იყო ჩიხში პოლიტიკურად. ამის გამოსავალი ხომ უნდა იყოს? ხალხი რაღაცას ელოდება ჩვენგან. მეც ვიფიქრე, რაღაც უნდა გავაკეთო. ამიტომ შემოვედი აქ და ავირჩიე თავმჯდომარე. ესეც კარგი შესაძლებლობა არის ჩემთვის მეც ამირჩიეს, მადლობელი ვარ, მოადგილედ", — თქვა მან ჟურნალისტებთან.

დმანისის მუნიციპალიტეტი ერთ-ერთი იყო, სადაც 3 დეკემბერს საკრებულოს პირველი სხდომა ჩაიშალა, რადგან ქართული ოცნებას 15 დეპუტატი ჰყავდა, ქვორუმისთვის კი 16 დეპუტატის მონაწილეობა იყო საჭირო. დმანისის საკრებულოში ოპოზიცია ბოიკოტს აცხადებდა.

რაც შეეხება ახალარჩეულ თავმჯდომარეს, პაატა ყულიაშვილი ამბობს, რომ მოადგილის პოზიცია ისედაც ოპოზიციონერი დეპუტატისთვის იყო გათვლილი. ენმ-ის წევრი ლევან მოსეშვილი კვლავ ამბობს, რომ რამაზანოვზე ზეწოლა მოახდინეს. მან, ასევე, აღნიშნა, რომ უშუალო კომუნიკაცია რამაზანოვთან არც დღეს არ ჰქონია.

"ჩვენი ინფორმაციით იგი დილით გამთენიისას მიიყვანა პოლიციამ, მერე ის უკანა შესასვლელიდან შეიყვანა, რითაც დადასტურდა, რომ ქართული ოცნება ახორციელებდა მასზე ზელას", — თქვა ლევან მოსეშვილმა ფორმულას ეთერში.

რამაზანოვის დაკარგვის შესახებ ინფორმაცია 8 დეკემბერს საკრებულოს ოპოზიციონერმა წარმომადგენლებმა გაავრცელეს. მათი თქმით, რამაზანოვს სახელმწიფო უსაფრთხოების სამსახური დაჭერით ემუქრებოდა, შემდეგ კი მათთვის გაურკვეველმა პირებმა წაიყვანეს და მისი ადგილსამყოფელის შესახებ ინფორმაცია არ ქონდათ. საკრებულოს წევრმა, ლევან მოსაშვილმა განაცხადა, რომ რამაზანოვი ორი კვირის წინ სკოლის დირექტორის პოზიციიდან გაათავისუფლეს.