ნაციონალური მოძრაობის წევრის, ეკა ხერხეულის განცხადებით, მიხეილ სააკაშვილი ჯანმრთელობის მდგომარეობიდან გამომდინარე, ხვალ, სავარაუდოდ, სასამართლო პროცესზე დასწრებას ვერ შეძლებს. მისი თქმით, ექსპრეზიდენტს წნევა აქვს და დამოუკიდებლად გადაადგილება უჭირს.

"ახლა აქვს წნევა, ადამიანი უბრალოდ ვერ მოძრაობს დამოუკიდებლად. ბარბაცით დადის, სავარძლიდან საწოლამდე მანძილი ძალიან პატარაა, მაგრამ სიმყარეს ვერ გრძნობს. არ აქვს ჯანმრთელობის მდგომარეობა იმგვარად, რომ ის დამოუკიდებლად გადაადგილდეს. მე ვფიქრობ, რომ ხვალ, რავიცი, ნეტა, ასე არ მოხდეს, მაგრამ ჩემი დღევანდელი შეხედულებით, დარწმუნებული ვარ, რომ ხვალ ის ფიზიკურად ვერ შეძლებს დასწრებას სასამართლოზე", — თქვა ხერხეულიძემ.

მისივე თქმით, სასამართლო სააკაშვილისთვის ერთადერთი შესაძლებლობაა, რომ ის ტრიბუნად გამოიყენოს და ექსპრეზიდენტს გული სწყდება, რომ ამას, სავარაუდოდ, ვერ მოახერხებს.

მიხეილ სააკაშვილის მორიგი სასამართლო პროცესი ხვალ, 9 დეკემბერს საქალაქო სასამართლოში გაიმართება. სხდომაზე ექსპრეზიდენტის მიერ სახელმწიფო საზღვრის უკანონო კვეთის საქმეს განიხილავენ.