ნაციონალური მოძრაობის წევრის, ეკა ხერხეულიძის განცხადებით, დღეს მიხეილ სააკაშვილს მაღალი წნევა ჰქონდა და ექოსკოპია გამოიძახეს, რადგან გლდანის ციხის სამკურანლო დაწესებულებაში ეს მომსახურება არ ჰქონდათ. ამის შესახებ მან ექსპრეზიდენტთან შეხვედრის შემდეგ ისაუბრა.

"დღეს მე შევესწარი მის ჰიპერტონიულ კრიზსს, რომელსაც, ასევე, დაესწრო ექიმი. ის იყო შეშფოთებული, იმიტომ, რომ 170/10-ზე დაუფიქსირდა მიხეილ სააკაშვილს წნევა და რაც მთავარია, ამას ვერ გრძნობს, რადგან ნორმად იქცა ის, რომ ყოველდღე უნდა ჰქონდეს მაღალი წნევა. მე ვუთხარი — თქვენ ახლა საკმაოდ გაწითლდით, არ გრძნობთ თავს შეუძლოდ? მითხრა — "ცოტა ცუდად ვარ და თუ შესაძლებელია, გავიზომავ წნევას". ავიდა, გაიზომა წნევა და ჰქონდა მაღალი წნევა, რაც მისთვის საგანგაშოა, თვითონ ექიმებიც შეშფოთდნენ", — აღნიშნა მან.

ხერხეულიძის განცხადებით, ასეთი იყო ექსპრეზიდენტის მდგომარეობა წინა დღეებშიც. მისი თქმით, როცა ადამიანს ყოველ საღამოს მაღალი წნევა აქვს, ის აუცილებლად საჭიროებს ექიმების მეთვალყურეობას.

"მხოლოდ და მხოლოდ მისცეს ერთი აბი კატროპრილი და ასე დასრულდა მისი "მკურნალობის პროცესი" და თავისთავად, ეს არ არის ნორმალური. მერე შეშფოთდა ადმინისტრაცია, გამოიძახეს ექოსკოპია, ადგილზე მომსახურებით არ ჰქონდათ ეს სერვისი. რაც არ უნდა საზოგადოებას თვალებში ნაცარი ვაყაროთ და ვუთხრათ, რომ ეს არის მულტიპროფილური კლინიკა, ეს არის ტყუილი", — აღნიშნავს ის.

მან აღნიშნა ისიც, რომ სააკაშვილის მდგომარეობა ყოველდღიურად უარესდება და შესაბამისი დახმარების აღმოჩენის მიზნით, ის დროულად უნდა გადაიყვანონ სამოქალაქო კლინიკაში.

"ადამიანს ხელი რომ მოჰკიდო და კანზე გადაუსვა, არის სულ თეთრი, იფრცქვნება ადამიანი. ნებისმიერი ნახავს, ვინც არ უნდა შეხვიდეთ, რომ მისი მდგომარეობა არ არის ნორმალური. თუ ეს ადამიანი დროზე არ გადაიყვანეს და მას არ აღმოუჩინეს დახმარება, მე არ ვიცი, იმ შემთხვევაში, როდესაც დადგება კრიტიკული მომენტი, უშველიან თუ არა ამას", — აღნიშნა ხერხეულიძემ.

ექსპრეზიდენტ მიხეილ სააკაშვილის სამოქალაქო კლინიკაში გადაყვანის მოთხოვნით აქციები თითქმის ყოველდღიურ რეჟიმში იმართება. პოლიტიოსები, სამოქალაქო სექტორის წარმომადგენლები და აქტივისტები ხელისუფლებას მოუწოდებენ სააკაშვილი მულტიფუნქციურ სამედიცინო დაწესებულებაში გადაიყვანო, ხელისუფლება უსაფრთხოების არგუმენტით უარზეა.

სააკაშვილი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში 8 ნოემბერს გადაიყვანეს. სააკაშვილი 48-ე დღეა შიმშილობს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.