მალე ჰარი სტაილსის ფრჩხილის ლაქის გამოყენებას შეძლებთ — გრემის მფლობელი მომღერალი თავის მოვლის საშუალებების გენდერულად ნეიტრალურ ხაზს, სახელად Pleasing უშვებს.

საწყის ეტაპზე ჰარის ახალი ბრენდი მყიდველებს მარგალიტის ბზინვარებით შთაგონებულ 4 ფერის ფრჩხილის ლაქს, თვალისა და ტუჩის მოვლის საშუალებებსა და სახის შრატს შესთავაზებს. ბრენდის ვებგვერდზე პროდუქციას ქალები და კაცები წარადგენენ. სტაილსის ახალი პროდუქცია გენდერულად ნეიტრალურია — მისი გამოყენება ნებისმიერ ადამიანს შეუძლია.

ფოტო: PLEASING

ახალი ბრენდის შესახებ მომღერალმა გამოცემა Dazed-თან ინტერვიუში ისაუბრა. მისი თქმით, თავდაპირველად ფრჩხილის ლაქები საკუთარი თავისთვის შექმნა, თუმცა საბოლოოდ დარწმუნდა, რომ ეს "სახალისო პატარა პროექტი" უბრალო ფრჩხილის ლაქზე ბევრად უფრო მნიშვნელოვანი რამ შეიძლებოდა ყოფილიყო.

ფოტო: RAFAEL PAVAROTTI

ფოტო: RAFAEL PAVAROTTI

ჰარიმ აღნიშნა, რომ ბრენდი იმ პროდუქციას უშვებს, რომელსაც თავადაც გამოიყენებდა. ფრჩხილის ლაქების მიმართ მომღერლის სიყვარული მისმა ყველა გულშემატკივარმა იცის, ამიტომ გასაკვირი სულაც არაა, რომ ახალ ხაზში წამყვანი ადგილი სწორედ აღნიშნულ პროდუქტს ეთმობა.

"როდესაც გადავწყვიტეთ, რომ Pleasing თავის მოვლის საშუალებების ბრენდი უნდა ყოფილიყო, მინდოდა დავრწმუნებულიყავი, რომ ამ საშუალებებს თავადაც გამოვიყენებდი. არ მინდოდა, ისეთი პროდუქცია შემექნა, რომელიც ხალხს შენიღბვაში დაეხმარებოდა — მინდოდა, მათი სილამაზისთვის ხაზი გამესვა", — ამბობს ჰარი.

ფოტო: RAFAEL PAVAROTTI

ფოტო: RAFAEL PAVAROTTI

მომღერლის თქმით, მისი მიზანია, პროდუქციამ ადამიანებს მეტი თავდაჯერება შესძინოს და ბედნიერება მოუტანოს.

"არ ვფიქრობ, რომ სილამაზე ან თავის ლამაზად აღქმა იმაზეა დამოკიდებული, თუ როგორ გამოიყურები. როდესაც ადამიანები ბედნიერები არიან და ბზინავენ, ისინი ანათებენ. ვფიქრობ, პროდუქცია სწორედ ამას აკეთებს — მათ ეხმარება, თავი ლამაზად იგრძნონ", — ამბობს ჰარი.