მიხეილ სააკაშვილის პირადი ექიმის, ნიკოლოზ ყიფშიძის განცხადებით, ექსპრეზიდენტს სხეულის სხვადასხვა ნაწილში დაზიანებები აქვს.

"აქვს სხვადასხვა ნაწილებში დაზიანებები, მე შევამჩნიე ჩემი თვალით, მაგრამ ეს დაზიანებები აღნიშნული იყო, ასევე, ფოტოსურათებით ასე, რომ დასამალი აქ არაფერი არ არის. ერთს გეტყვით, რომ სუსტად არის, მაგრამ ძალიან ემზადებოდა დღეს სასამართლოზე გამოსვლისთვის, შინაგანად ძალიან გაძლიერებული იყო და ელოდა, ფიქრობდა, რომ მისცემდნენ უფლებას გამოსულიყო. არ გამოვიდა ეს და ცოტა უკმაყოფილოა, ცოტა კი არა ძალიან უკმაყოფილოა", — თქვა მან.

ექიმის თქმით, მისი რეკომენდაცია ისევ ის არის, რომ რაც შეიძლება სწრაფად გადაიყვანონ მიხეილ სააკაშვილი ისეთ მრავალპროფილურ საავადმყოფოში, სადაც მის მკურნალობას შეძლებენ.

"ჩემი რეკომენდაციაა, რომ რაც შეიძლება სწრაფად გადავიყვანოთ ისეთ მრავალპროფილურ საავადმყოფოში, სადაც შესაძლებელი იქნება მისი მკურნალობა. აქ ეს დიდხანს ვერ გაგრძელდება, დაიმახსოვრეთ ჩემი სიტყვა",— ამბობს ყიფშიძე.

8 ნოემბერს ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

ნინო ლომჯარიას განცხადებით კი, სააკაშვილს ციხეში უთხრეს, რომ ის სამოქალაქო კლინიკაში უნდა გადაეყვანათ და შესაბამისად, ის აღნიშნულ შეთავაზებას დათანხმდა. მიუხედავად ამისა, სააკაშვილი მაინც ციხის საავადმყოფოში გადაიყვანეს, მოგვიანებით კი გაავრცელეს კადრები, რომლითაც სურთ დაამტკიცონ, რომ ექსპრეზიდენტს #12 დაწესებულება მისი ნების საწინააღმდეგოდ არ დაუტოვებია.

სააკაშვილი ამბობს, რომ #18 დაწესებულებაში გადასვლისას ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში", რის შემდეგაც მასზე ფიზიკურად იძალადეს.

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.