საპატრულო პოლიციის დეპარტამენტის უფროსის, ვაჟა სირაძის მტკიცებით, აქციის მონაწილეები სუს-ის შენობის მოპირდაპირე მხარეს, ტროუტართან იმის გამო დააკავეს, რომ ისინი პოლიციელებს შეურაცხყოფას აყენებდნენ.

მისივე თქმით, აქციაზე მონაწილეები მშვიდობიანი მანიფესტაციის ფარგლებს გასცდნენ და სახელმწიფო დაწესებულებების ბლოკირება მოახდინეს.

"როგორც საზოგადოებისთვის არის ცნობილი, თბილისში სხვადასხვა ლოკაციაზე მიმდინარეობდა საპროტესტო აქციები, რაც გულისხმობდა, მათი განცხადებით, სახელმწიფო დაწესებულების შენობებთან პიკეტირებას. იმ ადგილებში, სადაც აქციის მონაწილეები გასცდნენ მშვიდობიანი მანიფესტაციის ფარგლებს და იქ, სადაც მოახდინეს სახელმწიფო დაწესებულებების შესასვლელების ბლოკირება, პოლიციამ მიიღო კანონით გათვალისწინებული შესაბამისი ზომები. როგორც მოგეხსენებათ, მშვიდობისა და მანიფესტაციის სახელმწიფო კანონით აკრძალულია სახელმწიფო დაწესებულებების შესასვლებების ბლოკირება", — აცხადებს ის.

სირაძე ამბობს, რომ მათ აქციის მონაწილეებს კანონდარღვევისკენ მიუთითეს და მოუწოდეს, რომ სუს-ის მიმდებარე ტერიტორია დაეტოვებინათ და "არ გაეგრძელებინათ კანონის დარღვევა".

შსს-ს ინფორმაციით, დღეს, დაახლოებით ერთ საათში, პოლიციამ ჯამში 46 ადამიანი დააკავა.

მიხეილ სააკაშვილის სამოქალაქო კლინიკაში გადაყვანის მოთხოვნით მოქალაქეები 3 სხვადასხვა ლოკაციაზე შეიკრიბნენ. პოლიციამ აქციის მონაწილეთა დაკავება უშუალოდ აქციის დაწყებამდე დაიწყო.

დღესვე დაგეგმილია კიდევ ერთი აქცია, თუმცა ნაციონალური მოძრაობის თავმჯდომარემ, ნიკა მელიამ ადგილი არ დაასახელა. მისი განმარტებით, ყოველდღე იქნება ერთი ისეთი საპროტესტო ლოკაცია, რომელსაც წინასწარ არ გაამხელენ.