ანჩისხატის დაბრუნების პროექტის საინიციატივო ჯგუფის ხელმძღვანელმა, ზაზა ნანობაშვილმა ანჩისხატის დაბრუნების მოთხოვნით 14 ნოემბერს მთავრობის კანცელარიასთან აქცია დააანონსა.

"აბსოლუტურად ყველანაირი რესურსით ვეცდებით, რომ ამ ხატის დაბრუნების მოთხოვნა იყოს ძალიან მაღალ დონეზე. მოთხოვნაა, რომ ხატი დაუბრუნდეს დედაქალაქის პირველ ტაძარს", — განაცხადა ნანობაშვილმა.

კითხვაზე, უჭერს თუ არა მათ მხარს საპატრიარქო და შეთანხმებულია თუ არა მათთან აქცია, საინიციატივო ჯგუფის ხელმძღვანელი პასუხობს, რომ აქცია დასმულ მოთხოვნასთან და ყველა იმ ადამიანთანაა შეთანხმებული, ვინც ამ ხატის დაბრუნების გულშემატკივარია.

ანჩისხატი შალვა ამირანაშვილის სახელობის ხელოვნების სახელმწიფო მუზეუმში ინახება. კულტურის სამინისტროს გადაწყვეტილებით, "მძიმე ინფრასტრუქტურული მდგომარეობის გამო" მუზეუმის ძირითადი შენობა დაიცლება. როგორც უწყებაში თქვეს, მუზეუმი მართვის განსაკუთრებულ რეჟიმზე გადადის. ამასთან, გავრცელდა ინფორმაცია ხელოვნების მუზეუმის დანგრევასთან დაკავშირებით, რასაც სამინისტრომ სიცრუე უწოდა და განაცხადა, რომ "სიცრუის ავტორები და მათ ზურგს ამოფარებული სხვა პირები ამ გზით საკუთარი უმოქმედობით გამოწვეული სავალალო შედეგების გადაფარვას ცდილობენ".

რაც შეეხება საგანძურს, 4 აგვისტოს საპატრიარქოს მიერ გავრცელებული განცხადებიდან გავიგეთ, რომ ეროვნულ მუზეუმთან დადეს შეთანხმება, რომლის თანახმადაც, მუზეუმის შენობის აღდგენის შემდეგ, იქ უნდა დაბრუნდეს როგორც ხელოვნების მუზეუმი, ასევე ოქროს ფონდი — საეკლესიო საგანძური, ექსპონატებს კი დროებით სიმონ ჯანაშიას სახელობის საქართველოს ისტორიის მუზეუმში გადაიტანდნენ.

ანჩისხატის გადაცემის მოთხოვნით საქართველოს პატრიარქმა, ილია მეორემ პრემიერმინისტრს, ირაკლი ღარიბაშვილს 3 აგვისტოს მიმართა. წერილის ადრესატია კულტურის მინისტრიც, თეა წულუკიანი.

წერილში აღნიშნულია, რომ ხელისუფლების წინაშე დიდი ხანია, ხატის გადმოცემის საკითხს აყენებენ, რაზეც მათი განცხადებით, "მზაობა ყოველთვის იყო", თუმცა არსებობდა მისი დაცვისთვის სათანადო პირობების შექმნის მოთხოვნა.

პატრიარქის წერილში ნათქვამია, რომ ანჩისხატის დაბრუნების საინიციატივო ჯგუფმა ამ მხრივ სამუშაოები ჩაატარა და ანჩისხატის ტაძარში ხატის ჩასაბრძანებელი კიოტი დამონტაჟდა.

გარდა ამისა, 31 ოქტომბერს საპატრიარქო ტახტის მოსაყდრე შიო მუჯირმა ანჩისხატთან დაკავშირებით პრემიერმინისტრ ირაკლი ღარიბაშვილს ღია წერილით მიმართა და მას ანჩისხატის დროულად დაბრუნების საჭიროება შეახსენა.