ტონგაში COVID-19-ის საწინააღმდეგო ვაქცინაცია მას შემდეგ გააქტიურდა, რაც წყნარი ოკეანის ამ კუნძულოვან სახელმწიფოში 30 ოქტომბერს კორონავირუსის პირველი შემთხვევა დადასტურდა.

ინფექცია სრულად ვაქცინირებულ ადამიანს დაუდასტურდა, რომელიც ახალი ზელანდიიდან სამშობლოში ჩამოფრინდა. ტონგას პრემიერმინისტრმა მოსახლეობა უკვე გააფრთხილა, რომ მომავალ კვირაში, შესაძლოა, მთავარი კუნძულის, ტონგატაპუს, იზოლაცია გახდეს საჭირო.

ტონგა იმ უკანასკნელ ქვეყნებიდან ერთ-ერთი იყო, რომლებშიც COVID-19 დღემდე არ გავრცელებულა. კუნძულზე 100 ათასზე მეტი ადამიანი ცხოვრობს და ის ახალი ზელანდიის ჩრდილო-აღმოსავლეთით მდებარეობს. მოსახლეობის მესამედი უკვე აცრილია და ქვეყნის იმუნიზაციის კოორდინატორის განცხადების მიხედვით, პირველი შემთხვევის დადასტურების შემდეგ ვაქცინაციის ცენტრებში ათასობით ადამიანი გამოცხადდა.

ინფიცირებული ტონგაში 213 ადამიანთან ერთად ახალი ზელანდიის ქალაქ კრაისტჩერჩიდან ბრუნდებოდა. ქვეყნიდან გასვლისას მისი ტესტი უარყოფითი იყო, მაგრამ დაბრუნებულს სავალდებულო იზოლაციის პერიოდში COVID-19 დაუდასტურდა. რადგან ინფიცირებულმა ვაქცინის მეორე დოზა ოქტომბრის შუა რიცხვებში გაიკეთა, ექიმები ფიქრობენ, რომ მისი მდგომარეობა არ დამძიმდება.

ვირუსი ჯერ კიდევ არ გავრცელებულა ტუვალუსა და ნაურუში, რომლებიც წყნარი ოკეანის კუნძულოვანი ქვეყნებია. ასევე ჩრდილოეთ კორეა და თურქმენეთი ოფიციალურად COVID-19-ის შემთხვევების არსებობას არ ადასტურებს, თუმცა ექსპერტები ფიქრობენ, რომ ასეთი სტატისტიკა სიმართლეს არ შეესაბამება და ინფიცირებულთა რიცხვი გაცილებით მაღალია.