თბილისის მერმა, დავით ნარმანიამ შპს თბილსერვის ჯგუფსა და ზედამხედველობის საქალაქო სამსახურს ქალაქის ქუჩებში საბურავების დაყრასთან დაკავშირებით კონტროლის გამკაცრება დაავალა. ამის შესახებ ინფორმაციას უწყების პრესსამსახური ავრცელებს.

"დავალების შესაბამისად, შეიქმნება სპეციალური ჯგუფი, რომელიც უზრუნველყოფს კონტროლს - ფიზიკური და იურიდიული პირები, დედაქალაქის ქუჩებსა და კომერციული ფართების წინ საბურავების დაყრის შემთხვევაში, დაჯარიმდებიან ადმინისტრაციული წესით, „ნარჩენების მართვის კოდექსის“ შესაბამისად," - აღნიშნავენ თბილისის მერიის პრესსამსახურში.

თბილისის მერია მოქალაქეებს მოუწოდებს, ძველი საბურავები სპეციალურად გამოყოფილ ადგილას მიიტანონ. თუმცა, უწყების პრესრელიზში არაა დაკონკრეტებული სადაა გამოყოფილი სპეციალური ადგილი.