მამა ზაზა თევზაძე აცხადებს, რომ უაღრესად მნიშვნელოვანია სასამართლოს გადაწყვეტილების აღსრულება, ნინოწმინდის ბავშვთა პანსიონიდან ბავშვების დაუყოვნებლივ გაყვანასთან დაკავშირებით.

"ბევრი კითხვებია, ისეთი კითხვები, რომელზეც პასუხი აუცილებელია, მაგრამ, როდის გაეცემა, მე არ ვიცი, მადლობა ღმერთს, რომ სასამართლო დადგენილება მოვისმინე. უაღრესად მნიშვნელოვანია, რომ ეს ძალაში შევიდეს და აღსრულდეს, რომ იქედან [ნინოწმინდის პანსიონი] იქნას გაყვანილი ის ბავშვები. ახალ ველოსიპედს ხომ არ ვიგონებთ?! არსებობს ეს პრაქტიკა და ამის აღსრულება შესაძლებელია. ამის მონიტორინგი მთელი საზოგადოებისთვის არის, იმიტომ, რომ ესენი ჩვენი შვილები არიან. მაინცდამაინც ის ხომ არ არის აუცილებელი, რომ შენი გენები ჰქონდეს ყველას?!" — განაცხადა მამა ზაზამ ფორმულას ეთერში.

იგი ეკლესიის პოზიციას აფასებს როგორც სახელმწიფო ინსტიტუტების აბუჩად აგდებას. მისი თქმით, ეკლესიას საკითხთან მიმართებით აქვს უხეში და ბრუტალური მიდგომა, რაც აზიანებს თავად მასაც და სახელმწიფოსაც.

"ბავშვის თემა იმდენად მნიშვნელოვანია, ბავშვთან შეხება, მასთან ურთიერთობა, შესაბამისი მას მომზადებაც უნდა ჰქონდეს უნდა იცოდეს, რაღაცა კონცეპტუალური არსი უნდა იდოს, რომ რისი გაკეთება შეუძლია და რატომ მაინცდამაინც ეს. მე ვიტყოდი, რომ ეკლესიის ასეთი უხეში, ასეთი ბრუტალური მიდგომით ზიანდება როგორც ეკლესია, [ისე] მთელი საზოდადოება, სახელმწიფო — აბუჩად აგდებული არის სახელმწიფო ინსტიტუტები, მთელი საზოგადოება. ჰოდა, რატომ აირჩიეს [ეს მიდგომა] მეც არ ვიცი, მართალი რომ გითხრათ. იმდენად სულის შემძვრელია და შოკის მომგვრელია ეს ყველაფერი, რომ მეც შეწუხებული ვარ", — განაცხადა მამა ზაზამ.

მან, ასევე, აღნიშნა, რომ უწევს იმ ინსტიტუციის კრიტიკა, რომელსაც თავად წარმოადგენს, თუმცა, ფიქრობს, რომ მსგავს საკითხებზე გაჩუმება არ შეიძლება.

"მე იმ ინსტიტუციას წარმოვადგენ, რომლის კრიტიკაც მიწევს და თავზე ხელს ამისთვის არავინ არ გადამისვამს და არც მადლობას არავინ მეტყვის, მაგრამ, მე მაქვს ჩემი ურთიერთობა ჩემს ღმერთთან, რის გამოც ვარ მე ეკლესიაში და რისთვისაც მივუძღვენი ჩემი თავი ამას. ეს არის ჩემთვის ყველაზე არსებითი. ამიტომ, მსგავს რაღაცებზე გაჩუმება არ შეიძლება", — განაცხადა მამა ზაზა თევზაძემ.

დღეს საპატრიარქოში განაცხადეს, რომ გაასაჩივრებენ სასამართლოს გადაწყვეტილებას ნინოწმინდის პანსიონიდან ბავშვების გაყვანის შესახებ. მოსამართლე ივანე ღლონტმა ორგანიზაცია პარტნიორობა ადამიანის უფლებებისთვის საჩივარი გუშინ, 5 მაისს დააკმაყოფილა.