ფრანგული კინო მსოფლიო კინოს ისტორიაში გამორჩეულ ადგილს იკავებს და მას უამრავი თაყვანისმცემელი ჰყავს.

კინოს დაბადება სწორედ ფრანგ ძმებ ლუმიერებს უკავშირდებათ, რომლებმაც პირველი კინოჩვენება 1895 წლის 22 მარტს ჩაატარეს, რამდენიმე თვის შემდეგ კი პირველი კინოთეატრიც გახსნეს პარიზის ერთ-ერთ კაფეში.

ბევრმა შეიძლება არც ის იცოდეს, რომ პირველი ქალი რეჟისორიც ფრანგი ელის გი ბლანში იყო.

პირველ მსოფლიო ომამდე საფრანგეთი იყო ერთადერთი ქვეყანა, რომელსაც საკუთარი კინოსტუდია ჰქონდა. მიუხედავად იმისა, რომ პირველი მსოფლიო ომის დამთავრების შემდეგ ეკონომიკური მდგომარეობა მთელ ევროპაში დამძიმდა და ხელოვნება პრიორიტეტი აღარ იყო, 1940-იან წლებამდე საფრანგეთში მაინც მოღვაწეობდნენ გამორჩეული კინოხელოვანები.

1950-60-იან წლებში საფრანგეთში კინოკრიტიკოსთა ჯგუფმა შექმნა კინოს ერთ-ერთი ყველაზე საინტერესო და მნიშვნელოვანი მიმდინარეობა - ფრანგული ახალი ტალღა, რომელზეც გავლენა იტალიურმა ნეორეალიზმმა მოახდინა. ამ მიმდინარეობის წამყვანი რეჟისორები უარყოფდნენ ტრადიციულ, კლასიკურ კინემატოგრაფიულ ფორმებს და "სხვა კინოს" ქმნიდნენ. ესენი იყვნენ: ფრანსუა ტრიუფო, ჟან-ლუკ გოდარი, ერიკ რომერი და სხვები.

მეორე მსოფლიო ომის შემდგომმა ვითარებამ დიდი როლი ითამაშა ამ რეჟისორების მსოფლმხედველობის ჩამოყალიბებაში, შეიძლება ითქვას, რომ სწორედ ამ მოვლენამ აჩვენა მათ გადამწყვეტი გზა შემოქმედებაში გამოხატული ჰუმანიზმისკენ.

სწორედ საფრანგეთში ჩამოყალიბდა თანამედროვე კინოს თეორია და ამ პერიოდში გამოვიდნენ ასპარეზზე ცნობილი ფრანგი ვარსკვლავები: ალენ დელონი, ჟანა მორო, კატრინ დენევი, ჟან-პოლ ბელმონდო, ბრიჯიტ ბარდო, ჟან გაბენი და სხვები.

ჟან პოლ ბელმონდო (83 წლის)

ალენ დელონი (81 წლის)

ბრიჯიტ ბარდო (82 წლის)

მიშელ მერსიე (78 წლის)

რობერ ოსეინი (89 წლის)

პიერ რიშარი (82 წლის)

კატრინ დენევი (73 წლის)

ჟანა მორო (89 წლის)

ჟერარ დეპარდიე (68 წლის)

ანუკ ემე (84 წლის)

იზაბელ აჯანი (61 წლის)

იმის გათვალისწინებით, რომ ფრანგულმა კინომ მსოფლიოს უამრავი ნიჭიერი მსახიობი და კინოშედევრი აჩუქა, სამწუხაროდ ყველა მათგანი აქ ვერ მოხვდებოდა, მაგრამ მომავალში მათზეც აუცილებლად მოგიყვებით.