მოსამართლეთა რიგგარეშე კონფერენციის პარალელურად, იუსტიციის უმაღლეს სკოლასთან აქცია მიმდინარეობს. კონფერენციაზე იუსტიციის უმაღლესი საბჭოს 4 წევრი უნდა აირჩიონ. სწორედ ამას აპროტესტებენ აქტივისტები და პროცესის შეჩერებას ითხოვენ. ადგილზე მობილიზებული პოლიციაც.

"ხელისუფლებამ უგულებელყო შარლ მიშელის დოკუმენტის ჩანაწერი, რომელიც პირდაპირ ეხება საბჭოს წევრების არჩევის წესს, რაც იმას ნიშნავს, რომ ეს საბჭოს წევრები შემდეგ აირჩევენ მოსამართლეებს, რომლებიც იქნება ისევ მურუსიძე-ჩინჩალაძის კლანი და კვლავ გვექნება მართული სასამართლო, რომელიც ისევ ბიძინა ივანიშვილის დაკვეთას შეასრულებს. ჩვენ მოვუწოდებთ, გადადონ პროცესი და შეიტანონ ცვლილებები, რადგან სამართლიანი სასამართლო არის ერთ-ერთი პრიორიტეტი ქვეყნისთვის, ამ დოკუმენტისთვის და საერთოდ, ჩვენი განვითარებისთვის დასავლური მიმართულებით", — აცხადებს სირცხვილიას ერთ-ერთი აქტივისტი, თამთა გოგოლაძე.

აქციას ესწრება საბჭოს არამოსამართლე წევრი, ნაზი ჯანეზაშვილიც. მისი თქმით, სასამართლო სისტემა ყველა პროცესს დაჩქარებულად წარმართავს, მათ შორის, საბჭოს წევრების არჩევასა და უზენაესი სასამართლოს მოსამართლეობის კანდიდატების წარდგენას, მიუხედავად შარლ მიშელის დოკუმენის ჩანაწერისა.

"დღეს ჩვენ ვნახავთ, როგორ უყვართ მოსამართლეებს ეს ქვეყანა, ვნახავთ, რა გადაწყვეტილებას მიიღებს დაახლოებით 250 მოსამართლე. გამორიცხული არაფერია, ესენი არიან ადამიანები, რომლებიც პირდაპირ ასრულებენ ხელისუფლების დაკვეთებს. თუ ხელისუფლებისგან ექნებათ გარკვეული მითითებები, შეიძლება ეს კონფერენცია სხვაგვარად განვითარდეს. მაგრამ რასაც ჩვენ ამ წლებში ვაკვირდებით სასამართლოში მიმდინარე პროცესებს, მე არ მაქვს მოლოდინი, რომ რაიმე პოზიტიურ გადაწყვეტილებას მიიღებენ. პირიქით, ვფიქრობ, რომ ისინი ნაბიჯებს გადადგამენ იქითკენ, რომ მათი ძალაუფლება კიდევ უფრო გამყარდეს მომავალი რამდენიმე წლის განმავლობაში", — აცხადებს ჯანეზაშვილი.

შეგახსენებთ, რომ ევროკავშირის ელჩმა, კარლ ჰარცელმა, აშშ-ის ელჩმა, კელი დეგნანმა და ევროპის საბჭოს ოფისის ხელმძღვანელმა, ნატალია ვუტოვამ პარლამენტის თავმჯდომარეს წერილი მისწერეს და შარლ მიშელის შეთანხმებით აღებული პასუხისმგებლობები და ვალდებულებები შეახსენეს. კერძოდ, დიპლომატები აღნიშნავენ, რომ უზენაეს სასამართლოში მოსამართლეების და იუსტიციის უმაღლესი საბჭოს წევრების დანიშვნის პროცესი დაუყოვნებლივ უნდა შეჩერდეს. მათი განცხადებით, ეს აჩვენებს ნამდვილ ერთგულებას მართლმსაჯულების გამჭვირვალობასა და მის მიმართ ნდობის გაზრდის საქმეში.

წერილს წერილითვე უპასუხა კახა კუჭავამ. პარლამენტის თავმჯდომარის განცხადებით, კონსტიტუციისა და შესაბამისი კანონმდებლობის თანახმად, პარლამენტს იუსტიციის უმაღლესი საბჭოს არამოსამართლე წევრების დამტკიცება მიმდინარე წლის ივნისში ევალება. სპიკერი აღნიშნავს, რომ საქართველოს პარლამენტი არ არის უფლებამოსილი, დაელოდოს 2022 წლის საგაზაფხულო სესიაზე განსახორციელებელ საკანონმდებლო ცვლილებებს და საბჭოში ხუთი ვაკანსია მომდევნო ერთი წლის განმავლობაში შეუვსებელი დატოვოს.

შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმებაში წერია, რომ არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.