ქართული ოცნების დეპუტატის, მამუკა მდინარაძის განცხადებით, ნამახვანჰესის მოწინააღმდეგეთა აქციებით "ნებსით თუ უნებლიეთ" ის საქმე კეთდება, რომელიც აწყობს, "მაგალითად, ჩვენს ჩრდილოელ მეზობელს"

"მართლაც იყო გუშინ ის ელფერი, რომელიც პოლიტიკურ პროცესებად გარდაქმნას მოასწავებდა, ამაზე წინასწარ მე პროგნოზებს არ გავაკეთებ, თუმცა ერთი რამ ნამდვილად ვიცი, რომ საქართველოს ენერგოდამოუკიდებლობა არის ჩვენი საქმიანობის ერთ-ერთი მთავარი პრიორიტეტი. როდესაც ენერგოდამოუკიდებლობის და ამ კონკრეტულ შემთხვევაში ნამახვაჰესის წინააღმდეგ მიმდინარეობს აქცია, მაინც და მაინც მკაფიო არგუმენტებიც არ ჩანს, ადამიანები, რომლებიც აორგანიზებენ ამ აქცია პირდაპირ ეთერში დებატებზე და გადაცემაში მონაწილეობაზე უარს ამბობენ, ჩნდება გარკვეული ეჭვები, თუმცა ამის იქეთ მე ახლა არ წავალ. ნებსით თუ უნებლიეთ, ისინი აკეთებენ იმ საქმეს — მე არ ვაბრალებ, რომ მაინც და მაინც განზრახვაა — საქმე კეთდება ისეთი, რომელიც აწყობს, მაგალითად, ჩვენს ჩრდილოელ მეზობელს", — განაცხადა მდინარაძემ.

მისი თქმით, როცა საუბარია საქართველოს ენერგოდამოუკიდებლობსა და 800 მილიონზე მეტ ინვესტიციაზე და წინააღმდეგობის დროს ისეთი არგუმენტები უნდა ჰქონდეთ, რომელიც ამ ყველაფერს გადასწონის.

"მე არ მინდა წინასწარ პროგნოზი გავაკეთო, რომ ეს მთლიანად პოლიტიკური გახდება იმიტომ, რომ არ ვიცი ამის შესახებ. ყოველ შემთხვევაში, გუშინ პოლიტიკური მოთხოვნებიც გახმოვანდა ამ აქციაზე, რაც ძალიან სამწუხაროა. მე ვისურვებდი, რომ ყოფილიყო თანხმობა კახა კუჭავას ძალიან კარგ ინიციატივაზე, როდესაც მან კომუნიკაცია თავად სცადა და უთხრა — მოდით შევხვდეთ, გავიაროთ დეტალურად ყველა პრეტენზია, რაც შეიძლება, გქონდეთ. როცა პარლამენტის თავმჯდომარე ამას გთავაზობს და შენ ეუბნები, რომ იცით რა? უკანა ეზოში გამოდი და იქ პირდაპირ ეთერში ჩავერთოთ, ანუ არ გინდა, რომ ასეთ შეხვედრა შედგეს.

არგუმენტების ჭიდილი შესაძლოა იყოს ის ერთადერთი რეცეპტი, რითაც საზოგადოება გადაწყვეტს, ვინ არის აქ მართალი. სასწორის ერთ პინაზეა საქართველოს ენერგოდამოუკიდებლობა, ამავე პინაზე 800 მილიონ დოლარზე მეტი ინვესტიცია ამ ქვეყნისთვის და მეორე მხარეს ის მითები თუ რეალობა — ამასაც კი ხაზგასმით არ ვამბობ — მითები თუ რეალობა, რომელიც მათ აქვთ არგუმენტების სახით. ჩემი პირადი აზრია, რომ ამ ინტერესებს გარკვეული მითები ვერ გადაწონიან, იმიტომ რომ მითებია და არა რეალობა", — თქვა მდინარაძემ.