კულტურის, სპორტისა და ახალგაზრდობის მინისტრმა, თეა წულუკიანმა სამინისტროში ახალი სტრუქტურა ჩამოაყალიბა. სამინისტროს ინფორმაციით, გაუქმდა ყველა სამმართველო და სტრუქტურული ერთეულების გამსხვილების შედეგად 11 დეპარტამენტი ჩამოყალიბდა, მათ შორის, მასობრივი სპორტისა და ახალგაზრდულ საქმეთა დეპარტამენტი.

"გაუქმდა კულტურის დეპარტამენტი და მის ბაზაზე შეიქმნა ორი სტრუქტურული ერთეული — შემოქმედებითი პროცესის ხელშეწყობის დეპარტამენტი და კულტურაზე ხელმისაწვდომობის დეპარტამენტი.

სპორტის დეპარტამენტის ბაზაზე კი ცალკე ჩამოყალიბდა მასობრივი სპორტისა და ახალგაზრდულ საქმეთა დეპარტამენტი, რაც ამ დარგში სამინისტროს პრიორიტეტული მიმართულება უნდა გახდეს. ცალკე განისაზღვრა მაღალი მიღწევების სპორტის დეპარტამენტი", — აცხადებენ უწყებაში.

მათივე ცნობით, სხვადასხვა სტრუქტურული ერთეულის გაერთიანების ხარჯზე შეიქმნა ახალი — კულტურული მემკვიდრეობისა და კულტურულ ფასეულობათა დაცვის გენერალური ინსპექციის დეპარტამენტი.

სამინისტროს განცხადებით, მოცემული ცვლილების შედეგად 1-ლი ივლისიდან სსიპ საქართველოს კულტურული მემკვიდრეობის დაცვის ეროვნული სააგენტო აღარ იქნება საკუთარი საქმიანობის მაკონტროლებელი და ამ ფუნქციას სახელმწიფო ზედამხედველობის ორგანო — სამინისტრო შეასრულებს.

წულუკიანმა ჯერ კიდევ 22 მარტს დააანონსა, რომ სპორტის მიმართულებით იგი აქცენტს მასობრივ სპორტზე გააკეთებდა. მისი თქმით, ახალგაზრდებისთვის სპორტზე წვდომა არის "ძალიან ძვირი სიამოვნებაა ხშირად".