5 მარტს ბერლინის საერთაშორისო ფესტივალის გამარჯვებულები დასახელდნენ და მართალია, ექვსკაციანი სპეციალური ჟიურისგან ალექსანდრე კობერიძის კინოსურათმა რას ვხედავთ, როდესაც ცას ვუყურებთ? ჯილდო ვერ დაიმსახურა, თუმცა სანაცვლოდ ქართულმა ფილმმა კინოკრიტიკოსების აღიარება მოიპოვა.

ბერლინალეს 71-ე გამოშვების გამარჯვებულების გამოცხადებამდე ცოტა ხნით ადრე კინოკრიტიკოსთა საერთაშორისო ასოციაციამ (ფიპრესი) რჩეული ფილმები ოთხ ნომინაციაში გამოავლინა და მათ შორის რას ვხედავთ, როდესაც ცას ვუყურებთ? საუკეთესო კუნოსურათად დაასახელეს.

აღსანიშნავია, რომ თითქმის 30-წლიანი პაუზის შემდეგ, როცა 1993 წელს თემურ ბაბლუანის ფილმს უძინართა მზე ვერცხლის დათვი გადაეცა, ბერლინის საერთაშორისო კინოფესტივალის მთავარ საკონკურსო პროგრამაში სრულმეტრაჟიანი ქართული ფილმი წელს პირველად მოხვდა.

რას ვხედავთ, როდესაც ცას ვუყურებთ? ალექსანდრე კობერიძის მეორე სრულმეტრაჟიანი კინოსურათია, რომლის სიუჟეტიც ქუთაისში ვითარდება და სიყვარულის ისტორიას მოგვითხრობს. სამსახიობო გუნდის წევრები გიორგი ბოჭორიშვილი, ანა ქარსელაძე, ოლიკო ბარბაქაძე, გიორგი ამბროლაძე და ვახტანგ ფანჩულიძე არიან.

წელს ბერლინალეზე მთავარი ჯილდო, ოქროს დათვი რუმინელ რეჟისორს რადუ ჟუდეს გადაეცა ფილმისთვის Bad Luck Banging or Loony Porn. სხვა გამარჯვებულების ხილვა შეგიძლიათ ამ ბმულზე.