პირველი მარტიდან რუსეთმა ხორბალზე საბაჟო გადასახადი გააძვირა, საქართველო კი ალტერნატიულ ბაზრებზე გადავა. საქართველოს ხორბლისა და ფქვილის მწარმოებელთა ასოციაციის აღმასრულებელი დირექტორის, ლევან სილაგავას თქმით, რუსეთის ხორბალი გარკვეული რაოდენობით ყაზახურით უკვე ჩანაცვლდა.

"ფასი არ გაზრდილა, უბრალოდ რუსეთი ჩანაცვლდა ამ წუთში გარკვეული რაოდენობით ყაზახური ხორბლით და გარკვეული რაოდენობით, სავარაუდოდ, ჩანაცვლდება უკრაინული ხორბლით, შესაძლოა, რუმინულიც იყოს.

ჩვენ ამ ეტაპზე რუსულიდან ყაზახურზე მთლიანად არ გადავდივართ, იმიტომ რომ რაოდენობრივად ყაზახური ხორბლის პოტენციალი არ არის იმდენი, რომ მთლიანად ეყოს საქართველოს, აზერბაიჯანს, სომხეთსა და სხვადასხვა ქვეყანას. შესაბამისად, იქნება გარკვეულწიდალ ჩანაცვლება, მაგრამ არა მთლიანი რაოდენობით", — აცხადებს სილაგავა მედიაცენტრ მთავარში.

მისივე თქმით, საქართველოს ხორბლის ორ თვის მარაგი აქვს და სახელმწიფო ასუბსიდირებს, რომ ქვეყანაში ყოველდღიური მოხმარების პური არ გაძვირდეს. ის, ასევე, აღნიშნავს, რომ თუ გარკვეული რაოდენობის პური არ დასუბსიდირდა, ფასი გაიზრდება.