კახეთში პოლიციამ ყაჩაღობის ბრალდებით 20 წლის ახალგაზრდა დააკავა. შინაგან საქმეთა სამინისტროს ცნობით, დაკავებული სურსათის მაღაზიაში შეიჭრა, მეპატრონეს ფიზიკური შეურაცხყოფა მიაყენა და ცივი იარაღით სიცოცხლის მოსპობით დაემუქრა. უწყების ინფორმაციით, მან, ასევე, 1 500 ლარის ოდენობის თანხა, ოქროს ბეჭედი, მობილური ტელეფონი და სიგარეტები წაიღო, რის შემდეგაც შემთხვევის ადგილიდან მიიმალა.

"პოლიციამ, ბრალდებულის პირადი ჩხრეკისას, ნივთმტკიცებად მოპარული თანხა და მობილური ტელეფონი ამოღო. ერთ-ერთი ლომბარდიდან, ასევე, ნივთმტკიცების სახით ამოღებულია ოქროს ბეჭედი. დაკავებული ჩადენილ დანაშაულს აღიარებს", — აცხადებენ შსს-ში.

ბრალდებული ჩოხატაურის მუნიციპალიტეტში დააკავეს. გამოძიება საქართველოს სისხლის სამართლის კოდექსის 179-ე მუხლით მიმდინარეობს, რაც ყაჩაღობას გულისხმობს. დანაშაული 6-დან 9 წლამდე ვადით თავისუფლების აღკვეთას ითვალისწინებს.