საპარლამენტო უმრავლესობის წევრის, თამარ ტალიაშვილის განცხადებით, ირაკლი ღარიბაშვილის გამოსვლა შთამბეჭდავი იყო და მან ისტორიულ რაკურსში საქართველოს განვითარება სწორად შეაფასა.

"ირაკლი ღარიბაშვილის გამოსვლა იყო შთამბეჭდავი და მე ვიტყოდი, რომ მან ისტორიულ რაკურსში ძალიან სწორად შეაფასა საქართველოს განვითარების და საქართველოში სამოქალაქო საზოგადოების განვითარების პროცესები. ეს იყო ძალიან საინტერესოდ წარმოჩენილი და მისი გზავნილები იყო ძალიან მკაფიო. არანაირ კითხვებს არ ბადებს ის გზავნილები, რომელიც იქნა გაჟღერებული", — განაცხადა ტალიაშვილმა.

საქართველოს პრემიერმინიტრობის კანდიდატმა, ირაკლი ღარიბაშვილმა პარლამენტში, კონსტიტუციის დღესთან დაკავშირებით გამართულ საზეიმო ღონისძიებაზე სიტყვის გამოსვლის დიდი ნაწილი ყოფილი ხელისუფლების კრიტიკას დაუთმო. მისი თქმით, ნაციონალურმა მოძრაობამ კონსტიტუცია ერთი ადამიანის ნება-სურვილს დაუქვემდებარა და ეს დოკუმენტი ფეხქვეშ ჰქონდათ გათელილი.