ნაციონალური მოძრაობის თავმჯდომარის, ნიკა მელიას ადვოკატებმა საქალაქო სასამართლოს გადაწყვეტილება გაასაჩივრეს. მელიას უფლებადამცველის, დიმიტრი საძაგლიშვილის განცხადებით, საჩივარი სააპელაციოში უკვე წარადგინეს.

მისი თქმით, თუ სააპელაციო იტყვის, რომ ამ საჩივრის განხილვის საშუალებას კოდექსი არ აძლევს, მაშინ ისინი მოითხოვენ, რომ სააპელაციომ საკონსტიტუციოს მიმართოს, რაც გამოწივევს მელიასადმი დევნის შეჩერებას.

"მიგვაჩნია, რომ როდესაც ხდება ადამიანისთვის პატიმრობის შეფარდება, მნიშნელობა არ აქვს ეს ხდება გამოძიების ეტაპზე, თუ არსებითი განხილვის მიმდინარეობისას, უნდა შეიძლებოდეს მისი გასაჩივრება. [...]

თუ სააპელაციო სასამართლო თვლის, რომ საჩივრის განხილვის საშუალებას არ აძლევს მას სისხლის სამართლის საპროცესო კოდექსი, მაშინ სააპელაციო სასამართლოს მოვთხოვეთ, რომ მიმართოს საკონსტიტუციო სასამართლოს წარდგინებით. ამ შუამდგომლობის მეორე ნაწილი გულისხმობს სისხლის სამართლებრივი დევნის შეჩერებას და საქმის განხივლის შეჩერებას. ანუ, როდესაც საერთო სასამართლო მიმართავს წარდგინებით საკონსტიტუციოს, საქართველოს კანონმდებლობის თანახმად, ავტომატურად უნდა მოხდეს დევნის შეჩერება", — განაცხადა მან.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა.

მელია ამბობს, რომ ვერ დაიჭერენ და ამაში მას მხარდაჭერას უცხადებს ოპოზიციაც. ნაციონალური მოძრაობის ოფისში ოპოზიციური პარტიების ლიდერები იმყოფებიან და მელიას დასაცავად "მორიგეობენ".

18 თებერვალს, დილით პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.

ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. პრემიერის გადადგომის შემდეგ შინაგან საქმეთა სამინისტრომ აღსრულების ღონისძიება გადადო.