ნაციონალური მოძრაობის თავმჯდომარე, ნიკა მელიას ამბობს, რომ რობოკოპები თუკი გამოჩნდებიან, ისე წავლენ სახლებში, როგორც მოვიდნენ. ასე გამოეხმაურა მელია, ენმ-ს ოფისის მიმდებარედ, შსს-ს განსაკუთრებულ დავალებათა დეპარტამენტის ეზოში პოლიციის სხვადასხვა დანაყოფების შესვლას.

"ამ ხელისუფლების საქმე წასული არის. თუკი მოვლენ რობოკოპები, როგორც მოვლენ, ისე წავლენ. როგორც დღეს სამსახურში გამოცხადნენ, ისე წავლენ სახლებში. ხვალ ისევ გამოცხადდებიან, ზეგ ისევ წავლენ და ერთ მშვენიერ დღეს ბევრი მათგანი სასმახურსაც თავს დაანებებს, იმ სამახურს, რომელიც არის ერთი კაცის სამსახური და არა ქვეყნის სამსახური", — აცხადებს ნიკა მელია მთავარ არხთან.

რამდენიმე საათის წინ, ენმ-ს ოფისთან, შსს-ს განსაკუთრებულ დავალებათა დეპარტამენტში პოლიციის დანაყოფები შევიდა. გავრცელებულ კადრებში ჩანს, რომ უწყებაში ათეულობით ავტომობილი, პოლიციის ავტობუსები და სამართალდამცავები შევიდნენ.

ამ წუთებში ნაციონალური მოძრაობის ოფისში ნიკა მელია ოპოზიციური პარტიების ლიდერებთან და მხარდამჭერებთან ერთად იმყოფება. On.ge ცდილობს შსს-სთან დაკავშირებას და გარკვევას, რას უკავშირდება პოლიციელების მობილიზება, მათ პასუხს მიღებისთანავე შემოგთავაზებთ.

შეგახსენებთ, რომ ნიკა მელიას სასამართლო სხდომის პარალელურად, თავდაპირველად ფორმულამ და შემდგომ სხვა ტელევიზიებმა გაავრცელეს კადრები, სადაც სამართალდამცავების გადაადგილება და ყვითელი ავტობუსები ჩანდა. სასამართლოში მელიას ადვოკატებმა მოსამართლეს უთხრეს, რომ ეს ნიშნავდა, რომ პოლიცია მელიას დაკავებას აპირებდა, რაც წინასწარ მიღებულ გადაწყვეტილებაზე მიანიშნებდა. ეს ინფორმაცია პროკურორმა უარყო.

დღისით შინაგან საქმეთა სამინისტროში სამართალდამცავების განსაკუთრებულ მობილიზებას უარყვეს. როგორც უწყებაში On.ge-ს უთხრეს, ეს არის გასაკუთრებულ დავალებათა დეპარტამენტის ბაზა, სადაც თანამშრომლების გადაადგილება ყოველდღიურად ხდება.

ოპოზიციის ლიდერები ამბობენ, რომ ფარად დაუდგებიან მელიას და მისი დაკავების უფლებას არ მისცემენ, რადგან უკანონო გადაწყვეტილებას არ ემორჩილებიან. ისინი ნაციონალური მოძრაობის ოფისში ნიკა მელიასთან ერთად არიან შეკრებილები და მორიგეობას გეგმავენ.

თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.