CRRC საქართველოს კვლევის მიხედვით, გამოკითხულთა 36% მიიჩნევს, რომ ქვეყანა არასწორი მიმართულებით ვითარდება. საწინააღმდეგო აზრზეა 31%, 15% კი ამბობს, რომ არ იცვლება. 17% ამ კითხვას არ პასუხობს ან ამბობს, რომ არ იცის.

რაც შეხება კითხვას ქვეყანაში ყველაზე მნიშვნელოვან პრობლემასთან დაკავშირებით, პირველ ადგილზე აქაც უმუშევრობაა — ასე 33% ფიქრობს. მეორე ადგილი აქვს კორონავირუსს (17%), ხოლო მესამე — სიღარიბეს (17%). ყველაზე მნიშვნელოვან პრობლემებს შორის სახელდება ფასების ზრდა, პოლიტიკური არასტაბილურობა და ჯანდაცვის ხელმისაწვდომობაც. მხოლოდ შემდეგ მოდის ტერიტორიული მთლიანობა (2%), შემდეგ კი, განათლების ხარისხი, ეკონომიკის მდგომარეობა და ა.შ.

CRRC საქართველომ კვლევა 2020 წლის 8-14 დეკემბერს ჩაატარა. ორგანიზაციის ცნობით, სატელეფონო ინტერვიუების მეშვეობით გამოკითხულია ე.წ. შემთხვევითი ნომრების გენერირების პრინციპით (Random Digit Dial) ამორჩეული 1 504 რესპონდენტი და გამოკითხვა ქვეყნის წარმომადგენლობითია, ოკუპირებული ტერიტორიების გამოკლებით. ინტერვიუები ჩატარდა აზერბაიჯანულ, სომხურ, რუსულ და ქართულ ენებზე და გამოპასუხების დონე 29%-ს შეადგენს. ცდომილების ზღვარი კი +/-0,7%-დან +/-7,4%-მდე მერყეობს.