"იყო მოლოდინი, მაგრამ ეს ბრძოლა იყო, ომი წინ არის" — განაცხადა ე.წ. კარტოგრაფების საქმეში ბრალდებული ივერი მელაშვილის ცოლმა, თამარ სულაძემ სასამართლო სხდომის დასრულების შემდეგ. დღეს ივერი მელაშვილი და ნატალია ილიჩოვა გირაოს სანაცვლოდ გაათავისუფლეს.

სასამართლო დარბაზიდან გამოსულმა მელაშვილმა პირველი კომენტარი მედიასთან უკვე გააკეთა. მისი განცხადებით, ბრალდებები "აბსურდულია" და არ შეიძლება, რომ ქვეყანაში ეს "მარაზმი" გაგრძელდეს. მელაშვილმა აღნიშნა ისიც, რომ იგი გირაოს არ ეთანხმება, რადგან არც მას და არც ილიჩოვას არანაირი ბრალეულობა არ მიუძღვით.

დღეს თბილისის საქალაქო სასამართლომ ნაწილობრივ დააკმაყოფილა პროკურატურის შუამდგომლობა, რომელიც აღკვეთის ღონისძიების შეცვლას — პატიმრობის ნაცვლად გირაოს შეფარდებას გულისხმობდა. სასამართლომ თითოეულ ბრალდებულს 20 000-ლარიანი გირაო შეუფარდა. ამასთან, დააკმაყოფილა პროკურატურის შუამდგომლობა ივერი მელაშვილის თანამდებობიდან გადაყენების შესახებ, რადგან მიიჩნია, რომ ეს თანამდებობა პირდაპირ არის კავშირში საქმეში არსებულ ინფორმაციებთან.