ჯანდაცვის მინისტრის მოადგილის, თამარ გაბუნიას განცხადებით, მნიშვნელოვანია, რომ დღეს მოსახლეობას უსაფრთხოების წესების დაცვა არ დაავიწყდეს.

"დღეს აღარ იმოქმედებს 21:00 საათიდან 05:00 საათამდე მოძრაობის შეზღუდვა. რა თქმა უნდა, ერთადერთი რეკომენდაცია, რომელიც ჩვენთვის მნიშვნელოვანია, რომ ინფექციის გავრცელების პრევენციისთვის შესრულდეს არის ისევ და ისევ ინდივიდუალურ დონეზე პირადი დაცვის საშუალებების გამოყენება — ნიღაბი, ხელის ჰიგიენა და ასევე, ფიზიკური დისტანციის დაცვა 2 მეტრი. ეს არის ძალიან მნიშვნელოვანი და ამდენად, დღეს დიდი დღესასწაულია, ყველა ველოდებით ამ დღეს, მაგრამ მნიშვნელოვანია, რომ ამ წესების დაცვა არ დაგვავიწყდეს და მივყვეთ იმას, რაც დაგვიცავს ინფექციის გავრცელებისგან", — განაცხადა გაბუნიამ.

დღეს, 21:00 საათიდან გადაადგილების შეზღუდვა ისევ მოიხსნება. გამონაკლისი მართლმადიდებელი მრევლისთვის არის დაწესებული, რომელიც 7 იანვრის ღამეს შობას აღნიშნავს.

ვიცე-პრემიერის, მაია ცქიტიშვილის განცხადებით, 24 დეკემბრის, კათოლიკური შობის ღამეს კათოლიკე მორწმუნეებს 144-ზე დარეკვით შეეძლოთ საშვის მიღება და შობის წირვაზე დასწრება, რაზეც კათოლიკე ეკლესიამ უარი განაცხადა.