ოკუპირებული აფხაზეთის საგანგებო სიტუაციების დე ფაქტო სამინისტროს განცხადებით, გალის რაიონში 5 იანვარს, დღის მეორე ნახევარში გაჩენილი ხანძრის კერები უკვე ლიკვიდირებულია. როგორც დე ფაქტო უწყებაში აცხადებენ, ხანძრის გავრცელებას თბილი ამინდი და ქარი უწყობს ხელს.

დე ფაქტო სამინისტროში ამტკიცებენ, რომ სოფელ სიდასთან და ზემო ბარგებთან გამხმარი ხეები იწვოდა. მათივე თქმით, დაზარალებული არაა, ხოლო სახლებსა და დასახლებებს საფრთხე არ შექმნიათ.

გალის რაიონში ხანძარი 4 იანვარს ღამით გაჩნდა. საგანგებო სიტუაციების დე ფაქტო სამინისტროს განმარტებით, 600 ჰექტარზე მინდვრები და ტყეები იწვოდა. ჯამში სტიქიამ 9 სოფელი მოიცვა. მათივე თქმით, სოფელ ზემო ბერგებში სამი საცხოვრებელი სახლი და სამეურნეო დანიშნულების შენობები დაიწვა.

ადგილობრივები ავრცელებენ ვიდეოებსა და ფოტოებს, სადაც ჩანს, რომ ხანძარი ბაღებსა და სახლებს არის მოდებული. ამასთან, ჯერ უცნობია, სრულად ლიკვიდირებულია თუ არა ხანძარი გალის რაიონში.