საგანგებო სიტუაციების მართვის სამსახურში აცხადებენ, რომ ამ დროისათვის ხანძრის 5 აქტიური კერაა, რომლის სალოკალიზაციო სამუშაოები მიმდინარეობს. მათი ინფორმაციით, სამეგრელოში არსებული 77 კერიდან 74 ლიკვიდირებულია, სამზე კი ქრობის სამუშაოები მიმდინარეობს. რაჭაში ორი კერიდან ერთი ლიკვიდირებულია, ერთზე კი სალოკალიზაციო სამუშაოები ხორციელდება.

"აჭარაში ერთ კერაზე მიმდინარეობს სალოკალიზაციო სამუშაოები. იმერეთში 18 კერიდან ყველა ლიკვიდირებულია. გურიაშიც 7 კერიდან ყველა ლიკვიდირებულია. კერების უმრავლესობაზე ცეცხლი ეკიდა ეკალ-ბარდსა და მინდორს. ბოლო 24 საათში მეხანძრე-მაშველებმა ტყეებსა და მინდვრებში ხანძრის 100 კერა ჩააქრეს. შინაგან საქმეთა სამინისტროს საგანგებო სიტუაციების მართვის სამსახურის 500-ზე მეტი მეხანძრე-მაშველი 50-ზე მეტი ერთეული სახანძრო-სამაშველო ტექნიკით, მთელი ქვეყნის მასშტაბით, 24 საათიან რეჟიმში აქრობს ცეცხლს, რის შედეგადაც 105 აქტიური კერიდან, 100-ის სრული ლიკვიდაცია მოხერხდა", — აცხადებენ საგანგებო სიტუაციების მართვის სამსახურში.

მათივე ცნობით, ასევე, დაფიქსირდა ტყის ქვედა საფარის ხანძარიც. აღნიშნული ხანძრების შედეგად კი არავინ დაშავებულა.

შინაგან საქმეთა სამინისტროს საგანგებო სიტუაციების მართვის სამსახური მოსახლეობას მოუწოდებს მინდვრებსა და სახნავ მიწებზე ბალახის დაწვისგან თავი შეიკავონ. უწყებაში ამბობენ, რომ დასავლეთ საქართველოში ძლიერი ქარი და მშრალი ამინდია, რაც მეხანძრე-მაშველებს ხანძრების სალიკვიდაციო სამუშაოებში ხელს უშლის. მათივე თქმით, მინდორსა და სახნავ მიწებზე ბალახის დაწვამ შეიძლება ხანძრის გავრცელება როგორც საცხოვრებელ სახლებზე, ასევე, ტყის მასივებზე გამოიწვიოს.

ხანძარია ოკუპირებულ გალის რაიონის სოფლებშიც. მოქმედი ტელევიზიის გალ TV-ს ცნობით, ხანძარია სოფელ სიდა, რეფსა და ბარღეფში. მედიის ინფორმაციით, ტყის მასივი იწვის, ცეცხლის ჩაქრობას კი ხელს ძლიერი ქარი უშლის. აფსნიპრესის კი იუწყება, რომ ხანძრების გამო, რაიონში საგანგებო მდგომარეობა გამოცხადდა.