სამხრეთ კორეამ საქართველოს 400 ათასი დოლარის ოდენობის ჰუმანიტარული დახმარება გადასცა, რომელიც სამედიცინო და ტექნიკურ აღჭურვილობას მოიცავს. დახმარების მიღების ცერემონია საქართველოს საგარეო საქმეთა სამინისტროში 28 დეკემბერს გაიმართა.

ღონისძიებას უძღვებოდნენ საგარეო საქმეთა მინისტრის მოადგილე ალექსანდრე ხვთისიაშვილი და საქართველოში კორეის რესპუბლიკის საქმეთა დროებითი რწმუნებული დაესუ ჩანგი. ასევე, ესწრებოდნენ სამინისტროსა და კორეის საელჩოს დიპლომატები და საქართველოს ელჩი სეულში ოთარ ბერძენიშვილი (დისტანციურად).

ალექსანდრე ხვთისიაშვილმა, საქართველოს მთავრობის სახელით, მადლობა გადაუხადა კორეის მთავრობას პანდემიასთან ბრძოლის საქმეში საქართველოსთვის გაწეული ფინანსური და ჰუმანიტარული დახმარებისთვის.

როგორც საგარეო საქმეთა სამინისტროში აღნიშნავენ, დამსწრეებს სიტყვით მიმართა კორეის რესპუბლიკის საქმეთა დროებით რწმუნებულმა, რომელმაც, აღნიშნა ის პროგრესი, რომელიც ორ ქვეყანას შორის ურთიერთობებში განვითარდა და გამოხატა თანამშრომლობის კიდევ უფრო გაღრმავების მზადყოფნა.