ენერგოომბუდსმენის, სალომე ვარდიაშვილი თქმით, დენის ტარიფის ზრდა გარდაუვალი იყო. ამის შესახებ მან სემეკის სხდომის შემდეგ განაცხადა, სადაც ელექტროენერგიის გაძვირებას მხარი დაუჭირეს.

"ტარიფში გათვალისწინებული დარჩა მხოლოდ და მხოლოდ ის ხარჯი და ის საკითხები, რომელიც აუცილებელია კომპანიის ნორმალური ფუნქციონირებისთვისა და სათანადო მომსახურების მისაწოდებლად", — აღნიშნა ვარდიაშვილმა ჟურნალისტებთან.

საქართველოს ენერგეტიკისა და წყალმომარაგების მარეგულირებელი ეროვნული კომისიის გადაწყვეტილებით, თელასისა და ენერგო-პრო ჯორჯიას მომხმარებლებისთვის, თბილისსა და რეგიონებში დენის ტარიფი იზრდება. საყოფაცხოვრებო მოხმარების ელექტროენერგიის ნაწილში ზრდა დაახლოებით 3,5 თეთრია. ხოლო რაც შეეხება კომერციულ ნაწილს, ის დიფერენცირებულია საფეხურების მიხედვით და 11-დან 13-თეთრამდე მერყეობს.

სემეკის სხდომაზე საკითხის განხილვის პარალელურად პრემიერმინისტრმა, გიორგი გახარიამ განაცხადა, რომ მომავალ წელს მოსახლეობის უმრავლესობას ელ.ენერგიის გაძვირებით გამოწვეული სხვაობა აუნაზღაურდება. შეღავათი შეეხება მათ, ვინც 300 კილოვატამდე ელექტროენერგიას მოიხმარს.