შინაგან საქმეთა სამინისტრომ ე.წ. ქურდული სამყაროს წევრობის ბრალდებით 2 პირი დააკავა.

უწყების ინფორმაციით, ბრალდებულები საზღვარგარეთ მცხოვრები ქართველი ე.წ კანონიერი ქურდის, როლანდ გეგეჭკორის მითითებით 2020 წლის დასაწყისიდან სამეგრელოში ბიზნესმენსა და მის ბიზნესპარტნიორს პერიოდულად უკავშირდებოდნენ და ქურდული სამყაროს სასარგებლოდ თანხის გადახდას სთხოვდნენ. შსს-ს ცნობით, 18 ნოემბერს ზუგდიდის მუნიციპალიტეტში ბრალდებულებმა ე.წ ქურდული გარჩევა გამართეს, რომელზეც აღნიშნული ბიზნესმენები როლანდ გეგეჭკორს ინტერნეტის საშუალებით გაასაუბრეს, რა დროსაც გეგეჭკორმა ბიზნესმენებს 2020 წლის დეკემბრის ბოლომდე 10 000 — 10 000 ლარის გადახდა დააკისრა. უწყების ცნობით, გეგეჭკორმა მათ, ასევე, ბიზნესსაქმიანობიდან მიღებული მოგების თანხის მომავალში ბიზნესპარტიორებსა და მას შორის თანაბრად გაყოფა მოსთხოვა.

შსს-ს ინფორმაციით, პოლიციამ ბრალდებულები საკუთარ საცხოვრებელ სახლებში მას შემდეგ დააკავეს, რაც ერთ-ერთმა დაზარალებულმა მათ მოთხოვნილი თანხა — 10 000 ლარი გადასცა. მათივე ცნობით, პოლიციამ დაკავებულების საცხოვრებელი სახლების ჩხრეკისას 9987 ლარი და გეკოს ტიპის იარაღი,ბრალდებულების მობილური ტელეფონები, რის საშუალებითაც ე.წ. კანონიერ ქურდს უკავშირდებოდნენ ნივთმტკიცებად ამოიღო.

შინაგან საქმეთა სამინისტროს ცნობით, საქმეზე გამოძიება სისხლის სამართლის კოდექსის 223-ე პრიმა მუხლის 1-ლი ნაწილით მიმდინარეობს.