სამართლიანი არჩევნების გამგეობის წევრმა, თამარ სართანიამ დღეს გამართულ ბრიფინგზე ისაუბრა იმაზე, თუ რატომ იყო ISFED-ის პარალელურ დათვლაში ხარვეზი და ვის ეკისრება პასუხისმგებლობა. მისი განმარტებით, ორგანიზაცია PVT-ის დამოუკიდებლად არ აკეთებს და ქირაობს ეროვნულ დემოკრატიული ინსტიტუტის, NDI-ის ექსპერტებს, რომელთაც, სართანიას თქმით, ISFED-მა წერილობით არ მიაწოდა ინფორმაცია იმის შესახებ, თუ როგორ ხდება საქართველოში საარჩევნო სუბიექტების მიერ მიღებული ხმების გამოთვლა. კერძოდ:

• კომისიამ დაადგინა, რომ ISFED-მა NDI-ის ექსპერტებს წერილობით მიაწოდა ლოგიკური შეცდომების ნუსხა, თუმცა ეს ნუსხა არ შეიცავდა კონკრეტულად საქართველოში საარჩევნო სუბიექტების მიერ მოპოვებული ხმების დათვლის ფორმულას. თუმცა კომისიამ უტყუარად ვერ დაადგინა, განხილული იყო თუ არა ბათილი ბიულეტენების დათვლის საკითხი ზეპირი შეხვედრების დროს.

"კომისიამ იმის დადგენა, რომ ეს ზეპირად შეხვედრაზე განიხილეს თუ არა, ვერ შეძლო, რადგან არსებობდა განსხვავებული მოსაზრებები. თუმცა აქ დავინახეთ ISFED-ის პასუხისმგებლობა, რომ ძალიან მნიშვნელოვანი დოკუმენტის წერილობით მიწოდება არ მოხდა. კომისიამ დაასკვნა, რომ ნამდვილად ადამიანური შეცდომა იყო ამ ფორმულაში დაშვებული შეცდომა და ამაში პასუხისმგებლობა, თანაბრად მიუძღვის, როგორც ISFED-ს, რომელიც იყო დამკვეთი, ასევე, NDI-ის ექსპერტებს, რომლებმაც არ გადაამოწმეს დამკვეთთან, ანუ ISFED-თან", — განაცხადა სართანიამ.

გარდა ამისა, მან განმარტა თუ რატომ იყო ISFED-ის ფორმულაში ხარვეზი. სართანიას თქმით, შეცდომა გამომდინარეობდა იქიდან, რომ პარალელური დათვლის დროს მათ ბათილი ბიულეტენები ჩათვალეს, რაც საქართველოს კანონდებლობით შედეგებში არ აისახება. თუმცა მისი განცხადებით, ეს ხარვეზი იმიტომ დაფიქსირდა, რომ PVT-ის მეთოდოლოგია გამოიყენება სხვა ქვეყნებშიც და წლიდან წლამდე ხდება ამ მეთოდოლოგიის დახვეწა — მათ შორის, ISFED-ის და სხვა ქვეყნების გამოცდილების საფუძველზე. კერძოდ:

"კითხვა დაისვა ასე, საქართველოში ბათილ ბიულეტენებს ძალიან დიდი ხანია არ ვითლით და თუ ISFED-ს ჰქონდა 2016-ში განხორციელებული ეს PVT, როგორ მოხდა, რომ 2016-ში სწორად დათვალა ფორმულამ და ახლა რატომ იყო შეცდომა? საქმე ის არის, რომ 2020 წლის პროგრამული უზრუნველყოფა არ ეყრდნობა 2016 წლის პროგრამულ უზრუნველყოფას. 4 წლის განმავლობაში ეს მეთოდოლოგია გამოიყენება სხვა ქვეყნებში, იხვეწება, ემატება დამატებითი ფუნქციები. ამიტომ, ყოველი შემდეგი PVT ეყრდნობა არა იმავე ქვეყანაში გამოყენებულ PVT-ის, არამედ ყველაზე ბოლოს სადაც იყო გამოყენებული. კომისიის მოკვლევით, სწორედ ამის გამო მოხდა პროგრამული უზრუნველყოფის დაფუძნება ისეთი ქვეყნის PVT-ზე, სადაც ბათილი ბიულეტენები ითვლება საარჩევნო სუბიექტების პროცენტული მაჩვენებლის გაანგარიშებით. ეს ქვეყანა არის სერბეთი, სადაც არჩევნები ჩატარდა 2020 წლის ივნისში", — განაცხადა მან.

გამგეობის განცხადებით, აღნიშნული ინფორმაცია ხარვეზის შესახებ ISFED-ის უკვე ყოფილმა აღმასრულებელმა დირექტორმა, ელენე ნიჟარაძემ ნოემბრის ბოლოს იცოდა, თუმცა მისი საზოგადოებისთვის გაცნობა მოგვიანებით გადაწყვიტა, ანუ მაშინ, როცა შუალედური შედეგები იქნებოდა ცნობილი. კომისიის განმარტებით, გადაწყვეტილება, ინფორმაციის გამჟღავნების გადადების შესახებ მიზანშეწონილი არ იყო, საზოგადოებასთან კომუნიკაცია დაგვიანებული გახლდათ, რამაც ნიჟარაძის პასუხისმგებლობა დააყენა და მან თანამდებობა დატოვა.