სამტრედიაში ქმარმა ცოლს სასიკვდილო ჭრილობა დანით მიაყენა. შინაგან საქმეთა სამინისტროში აცხადებენ, რომ დაჭრილი ქალი შემთხვევის ადგილზევე გარდაიცვალა.

"გამოძიებით დადგინდა, რომ ბრალდებულმა, ოჯახური კონფლიქტის ნიადაგზე, ცივი იარაღით ყელის არეში ჭრილობა მიაყენა ცოლს 47 წლის ქალი და მიიმალა. დანაშაულის ჩადენის იარაღი — დანა ნივთმტკიცების სახით ამოვიღეთ", — აცხადებენ შსს-ში.

ოჯახის წევრის მიმართ დამამძიმებელ გარემოებაში ჩადენილი განზრახ მკვლელობის ბრალდებით, კაცი სამტრედიაში, საკუთარ სახლთან ახლოს, მიტოვებულ სახლში დააკავეს. მათივე ცნობით, დაკავებული დანაშაულს აღიარებს.

შსს-ს ინფორმაციით, მომხდარზე გამოძიება საქართველოს სისხლის სამართლის კოდექსის 11 პრიმა-109-ე მუხლის მე-2 ნაწილის "ვ" ქვეპუნქტით მიმდინარეობს, რაც ოჯახის წევრის მიმართ დამამძიმებელ გარემოებაში ჩადენილ განზრახ მკვლელობას გულისხმობს.

დანაშაული 13-დან 17 წლამდე ვადით თავისუფლების აღკვეთას ითვალისწინებს.