ჯანდაცვის მინისტრობის კანდიდატის, ეკატერინე ტიკარაძის დამხმარედ წარდგენილი რობოტი პეპერი 24 დეკემბრიდან სითი მოლში მისულ მომხმარებელს სიცხეს გაუზომავს, სიმპტომებს შეუმოწმებს და თავის დასაცავად ზოგად რეკომენდაციებს გააცნობს. ამის შესახებ ინფორმაციას City Mall ავრცელებს.

"გამარჯობა, მე მქვია პეპერი პეპერი, ვარ მსოფლიოში პირველი ჰუმანოიდი რობოტი. საქართველოში მე იაპონიიდან კომპანია Georgian Integrated Systems დამსახურებით ჩამოვედი და ჩემი მიზანია დავეხმარო ადამიანებს პანდემიის წინააღმდეგ ბრძოლაში. 24 დეკემბრიდან სითი მოლში მოსულ ყველა მომხმარებელს დავეხმარები, გავუზომავ სიცხეს, შევუმოწმებ სიმპტომებს, გავაცნობ ზოგად რეკომენდაციებს თავის დასაცავად, მივაწვდი ინფორმაციას სითი მოლის შესახებ (მაღაზიებზე, პარკირების წესებზე, მუშაობის საათებზე) შევხვდებით სითი მოლში", — წერს სითი მოლი ფეისბუქ გვერდზე.

ჯანდაცვის მინისტრმა რობოტი პეპერი 18 ივნისს წარადგინა და საზოგადოებას მის დამხმარედ გააცნო. ტიკარაძის თქმით, პეპერი სამომავლოდ კორონავირუსთან ბრძოლაში დაეხმარებოდათ. რობოტი პრეზენტაციის შემდეგ სცენიდან გადავარდა. სოციალურ ქსელში გავრცელებულ ვიდეოში ჩანს, რომ რობოტი სცენიდან უკუსვლით გადიოდა, რა დროსაც კონსტრუქციის კიდესთან მივიდა და გადავარდა, თუმცა დამტვრევას გადაურჩა და დაიჭირეს.

"დღეს გვაქვს რამდენიმე მოულოდნელი სიურპრიზი და პირველი არის ჩემი დამხმარე პეპერი, რომელიც გუშინ ჩამოვიდა საფრანგეთიდან და სულ ახლახანს სწავლობს ქართულს. ის დაგვეხმარება სამომავლოდ Covid-19-ის დამარცხებაშიც. ეს არის ერთ-ერთი უახლესი სიტყვა ტელემედიცინაში", — განაცხადა ტიკარაძემ.

რობოტი დიდი ხნის განმავლობაში არ გამოჩენილა, 24 ნოემბერს კი ჯანდაცვის მინისტრმა განაცხადა, რომ რობოტი პეპერი, მხოლოდ ტელემედიცინის სიმბოლო იყო. მისი თქმით, პეპერის ჩამოყვანა არ ნიშნავდა, რომ მას რომელიმე კლინიკაში ვიხილავდით.