ქართული ოცნების დეპუტატი, გიორგი ამილახვარი ამბობს, რომ საქართველოს დისტანციური სწავლების ჰაბად ჩამოყალიბებაზე მისი ინიციატივა "დილეტანტისა" და მედიასაშუალებების მიერ არასწორად იქნა აღქმული და გაშუქებული.

"აღნიშნული იდეა გულისხმობს, იმას რისკენაც მიდის მსოფლიოს წამყვანი ქვეყნები. ეს ნიშნავს, უმაღლესი საგანმანათლებლო დაწესებულებებისთვის ისეთი საკანონმდებლო ბაზის და სტანდარტების შექმნას, რომელიც მისცემს მათ საშუალებას შეიმუშავონ პროგრამები, რომლის სრულად განხორციელება შესაძლებელია დისტანციურად, თანამედროვე ტექნოლოგიების გამოყენებით და შესაბამისი მეთოდოლოგიით, რომლის შეთავაზებაც მოხდება მხოლოდ უცხოელი სტუდენტებისთვის, რომლითაც მოხდება ქვეყნის განათლების სისტემის პრესტიჟის ზრდა, ინტერნაციონალიზაციის პროცესის გაფართოება და დამატებითი სახსრების მოზიდვა განათლების სექტორში. ეს იდეა საერთოდ გამორიცხავს ქართველი მოსწავლეებისთვის და სტუდენტებისთვის აღნიშნული პროგრამების შეთავაზებას, რაც სრულად დისტანციურ სწავლებას გულისხმობს. ბუნებრივია ეპიდემიის დასრულებისთანავე, საქართველოს ყველა საგანმანათლებლო დაწესებულება დაუბრუნდება ჩვეულ სწავლების მოდელს", — განმარტა ამილახვარმა.

მისივე თქმით, საქართველოს აქვს პოტენცილი იყოს რეგიონში საგანმანათლებლო ფლაგმანი და გახდეს, არა მხოლოდ დისტანციური არამედ მთლიანად განათლების ჰაბი, რისი მთავარი მიზიდულობის ცენტრიც იქნება ქუთაისის საერთაშორისო უნივერსიტეტი.

დისტანციური სწავლების ჰაბის ჩამოყალიბების ინიციატივაზე გიორგი ამილახვარმა დღეს, 22 დეკემბერს პარლამენტში კომიტეტზე ისაუბრა, სადაც განათელბის მინისტრობის კანდიდატს, მიხეილ ჩხენკელს უსმენდნე.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.