ფქვილის მწარმოებელთა ასოციაციის აღმასრულებელი დირექტორის, ლევან სილაგავას განცხადებით, მასობრივი მოხმარების პურზე ფასი არ გაიზრდება. მისი თქმით, ფასის ცვლილება შეეხება ე.წ. საგემოვნო პურს, რომელსაც მოსახლეობა ყოველდღიურად არ ყიდულობს.

"გაძვირებულია და შესაძლებელია გაძვირდეს ის პური, რომელიც თავისუფალ ბაზარზეა, ესაა ე.წ. საგემოვნო პურები: იგივე გერმანული პური, ავსტრიული პური, თონის პური, ლიტვური, და სხვა სეგმენტის პურები. ახლა რატომ, ამ პურზე პროგრამა არ არსებობს და არც ყოველდღიურად მოიხმარს მომხმარებელი.

სტატისტიკას თუ გადავხედავთ, მაგალითად, ადამიანები თონის პურს თვეში საშუალოდ 6-ჯერ, 7-ჯერ ყიდულობენ და არა ყოველდღიურად. შესაბამისად, თავისთავად ცხადია, რომ ადმიანს აქვს არჩევანი, იყიდოს მასობრივი მოხმარების პური და არ იყიდოს თონის პური, როცა მასობრივი მოხმარების პური ფიქსირებულად ეღირება იგივე ფასი, რაც დღეს არის და თონის პური, შესაძლოა, გაძვირდეს", — განაცხადა მან.

პურის ფასის დასარეგულირებლად, ხელისუფლებას სუბსიდია აქვს გამოცხადებული. ბოლო პერიოდში გავრცელდა ინფორმაცია, რომ პურის ფასი გაიზარდა, რასაც კრიტიკა მოყვა. სილაგავამ განმარტა, რომ მთავრობის პროგრამა მხოლოდ მასობრივი მოხმარების პურის სუბსიდიას ითვალისწინებს და მასზე ფასები არ გაიზრდება. პროგრამა 2020 წლის პირველი დეკემბერს დაიწყო და 2021 წლის 31 მარტამდე გაგრძელდება.