ქართული ოცნების წევრის, ლადო კახაძის თქმით, პანდემიამ დედამიწა ერთ დიდ "გოსპიტალს" დაამგვანა, სადაც ყველა დაავადებამ ერთად იჩინა თავი. მისივე თქმით, დედამიწა, ასევე, ჰგავს უნივერსიტეტს, სადაც ყველამ ყველაფერი იცის და სადაც ხალხი ერთმანეთზე "ინფორმაციის გადაცემითაა" დაკავებული.

"ყველას მოვუწოდებ, სანამდე საჯარო სივრცეში რაიმე განცხადებას გააკეთებთ, იცოდეთ, რომ მომლოდინე ყური და ტვინი ელოდება, რომელიც შეიძლება არასწორი ინფორმაციის დროს ისე დავაავადოთ, რომ მისი გამოკეთილშობილება გაგვიჭირდეს. აქ ცალკე ფენომენი შემოდის, იატროგენულ დაავადებას ემატება პოლიტიკური დაავადებაც, ამიტომ თხოვნა მაქვს, როდესაც საქმე შეეხება მედიცინას, ჯანმრთელობას, ადამიანთა სოცოცხლეს, ვთხოვ ყველას, გაფრთხილდნენ საჯარო სივრცეში მედიკოსების მიმართ არასწორი განცხადებების გაკეთებისგან", — განაცხადა კახაძემ.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.