პირველად მსოფლიოში - ტექნიკა, რომელიც სამი მშობლის გენეტიკური ინფორმაციის გაერთიანებას გულისხმობს, უშვილობის პრობლემის გადასაჭრელად გამოიყენეს.

ბავშვი, რომელიც 5 იანვარს გაჩნდა, სამი ადამიანის დნმ-ის შერწყმის შედეგად ჩაისახა. ეს სამედიცინო პროცედურა დიდ ბრიტანეთში გენეტიკური დაავადებების თავიდან ასაცილებლად არის დაშვებული და მსოფლიოში პირველად გამოიყენეს უშვილო წყვილის შემთხვევაში.

შვილოსნობის მკვლევარი ვალერი ზუკინი, რომელიც კიევის ერთ-ერთ კლინიკაში მუშაობს, ბავშვის მშობლებს ინ-ვიტრო განაყოფიერების კონკრეტული ტექნიკის გამოყენებით დაეხმარა.

წყვილი ათიოდე წლის განმავლობაში ცდილობდა ბავშვის ყოლას და ქალმა 4 წარუმატებელი ხელოვნური განაყოფიერება გამოიარა: მიუხედავად იმისა, რომ კვერცხუჯრედების განაყოფიერება წარმატებულად სრულდებოდა, შემდგომი განვითარების პროცესი მანამდე წყდებოდა, სანამ განაყოფიერებულ მასალას დედის სხეულში მოათავსებდნენ.

ექიმმა ზუკინმა და მისმა გუნდმა ჰიბრიდი ემბრიონი შექმნეს: მათ დედის კვერცხუჯრედი პარტნიორის სპერმით გაანაყოფიერეს, შემდეგ კი პრონუკლეოსი (ზიგოტამდელი წარმონაქმნი) სხვა დონორის კვერცხუჯრედში მოათავსეს. ამის შემდეგ ემბრიონმა განვითარება დედის საშვილოსნოში გააგრძელა. შედეგად, ბავშვს ორივე მშობლის გენეტიკური იდენტობა აქვს, მიტოქონდრიული დნმ კი დონორისგან გამოჰყვა.

ეს ახალი ერის დასაწყისია - განაცხადა ზუკინმა The Times-თან ინტერვიუში.

მიტოქონდრიული დონაცია 2015 წელს დიდი ბრიტანეთში დაშვებული იქნა იმ შემთხვევაში, როცა დედის მიტოქონდრიული დნმ არაჯანსაღია და გენეტიკური დაავადებები შეიძლება გამოიწვიოს ნაყოფში.

შარშან ეს პროცედურა მექსიკაშიც გამოიყენეს: დედას ნერვული სისტემის გენეტიკური დაავადება ჰქონდა.

უშვილობის ამ გზით მკურნალობას ყველა არ ემხრობა. მეცნიერები შეაშფოთა იმ ფაქტმა, რომ პროცედურა არარეგულირებად კერძო კლინიკაში ჩატარდა.

"თუ ბავშვი ჯანმრთელია, მაშინ ეს კარგი ამბავია, თუმცა ზოგადად სკეპტიკურად უნდა ვიყოთ განწყობილი, როცა მიტოქონდრიული დონაცია უშვილობის სამკურნალოდ გამოიყენება. ეს პროცედურა ძალიან სახიფათოა და ამ რისკზე პაციენტები მხოლოდ მაშინ მიდიან, თუ მემკვიდრეობითი გენეტიკური დაავადება აქვთ. ამ შემთხვევაშიც კი, ჩვენ გულდასმით ვარჩევთ, ვინ იქნება შესაფერისი ამ პროცედურისთვის და ვინ - არა", - ამბობს სარა ნორქროსი, პროგრესთან დაკავშირებული ეთიკის საკითხების შემსწავლელი ფონდის დირექტორი.

ზუკინის გუნდი ამბობს, რომ ამ დროისთვის ახალშობილს ყველა საჭირო ტესტი ჩაუტარდა და ის ჯანმრთელია.

"უკრაინაში ყველაფერი მარტივადაა, ეს პროცედურა აკრძალული არაა და არანაირი რეგულაცია არ გვზღუდავს", - განაცხადა ზუკინმა, რომელიც ამავდროულად უკრაინის რეპროდუქციული მედიცინის ასოციაციის ვიცე-პრეზიდენტია. ამ დროისთვის კლინიკაში კიდევ ერთ "სამმშობლიანი" ბავშვს ელოდებიან მარტში.

მიუხედავად აზრთა სხვადასხვაობისა, ზუკინის წარმატებული ექსპერიმენტი მილიონობით უშვილო წყვილს აძლევს იმედს. მეცნიერები კი ამბობენ, რომ საკითხი შესწავლას საჭიროებს როგორც სამედიცინო, ისე ეთიკური თვალსაზრისით.